241 total views
Inaanyayahan ng isang opisyal ng Catholic Bishops’ Conference of the Philippines ang mga mananampalatayang may pagpapahalaga sa sagradong buhay na makiisa sa Penitential Walk for Life 2026 na gaganapin sa Intramuros, Manila.
Ayon kay CBCP Episcopal Commission on the Laity chairman Dipolog Bishop Severo Caermare, mahalagang sama-samang manalangin at magnilay ang mga mananampalataya sa gitna ng mga hamong kinahaharap ng mundo at ng bansa sa kasalukuyan.
“Hello everyone, this is Bishop Ver, the Chairman of the CBCP Episcopal Commission on the Laity, inviting you to join the Penitential Walk for Life 2026. In these times of warring nations, where many people’s lives are at stake, rising prices of basic commodities, and corruption and growing uncertainty that affects our daily lives, we are called to return to God with humble hearts,” Paanyaya ni Bishop Caermare sa Radyo Veritas.
Ipinaliwanag ng Obispo na ang gawain ay isang pagkakataon para sa mga mananampalataya na sama-samang maglakad sa diwa ng panalangin, pagsisisi, at pag-asa habang iniaalay ang kanilang mga hakbang para sa pagtatanggol sa buhay at kapayapaan sa mundo.
“Let us walk together in prayer, repentance and hope, offering our steps for the protection of life, peace in our world, and strength for families facing many difficulties today,” Dagdag pa ni Bishop Caermare.
Hinihikayat ni Bishop Caermare ang lahat ng mananampalataya na makiisa sa gawain na magsisimula alas-2 ng hapon sa Intramuros, Maynila bilang tanda ng sama-samang paninindigan para sa kasagraduhan ng buhay.
“See you at Intramuros, Manila at 2pm. Let us come together and walk for life. God bless us all. Thank you,” Ayon pa kay Bishop Caermare.
Magsisimula ang pagtitipon ganap na alas-dos ng hapon sa Baluarte Plano Luneta de Sta. Isabel, Intramuros na susundan ng Penitential Walk with Via Crusis ganap na alas-kwatro kinse ng hapon kung saan sa diwa ng pagkakaisa at pananampalataya ay sama-samang maglalakad ang lahat patungong Minor Basilica and Metropolitan Cathedral o Manila Cathedral.
Inaasahan namang pangungunahan ni Manila Archbishop Jose Cardinal Advincula ang pagdiriwang ng banal na misa matapos ang maikling programa ganap na alas-syete y medya ng gabi.
Ang Walk for Life ay unang isinagawa noong 2017 sa pangunguna ng Sangguniang Layko ng Pilipinas na implementing arm ng CBCP – Episcopal Commission on the Laity na naglalayong ipahayag ang mariing paninindigan para sa buhay na hindi lamang nakatuon sa usapin ng extra-judicial killings kundi sa iba pang usapin na malaking banta sa buhay ng tao at maging ng kalikasan.
