661 total reads
Higit pang pinalalawak ng Caritas Manila ang pagtulong sa mga mahihirap sa lipunan.
Dahil dito magbubukas ng kauna-unahang Branch ang Segunda Mana, isa sa mga programa ng Social Action Arm ng Archdiocese ng Manila sa Western Visayas.
Nakatakda sa ika – 2 ng Hulyo 2018 ang pagbubukas ng Segunda Mana Charity Outlet sa 2nd floor, Marymart Center, Delgado St. Iloilo City ganap na ika – 11 ng umaga.
Mabibili sa Segunda Mana Outlet ang mga Pre-Loved items tulad ng Damit, Sapatos, Bag, Laruan at Iba pa sa abot kayang halaga kung saan ito ay mga Donasyon mula sa mga Organisasyon, mga Kumpanya at mga Indibidwal na may ginintuang pusong tumulong sa mga mahihirap sa lipunan.
Ito rin ay pagpapakita ng patuloy na pagpalaganap sa bawat mananampalataya ng kahalagahan ng pagtulong sa kapwa sa pamamagitan ng mga Programang para sa mahihirap.
Layon din nitong mapalakas at mapayabong ang kakayahan ng mga maliliit sa lipunan.
Ito ang ika – 31 branch ng Segunda Mana Outlet sa Bansa na layon ding mapalago ang pagkalap ng pondo para sa mga iskolar ng Youth Servant Leadership and Education Program kung saan 5 – libong mag-aaral sa Bansa ang tinutulungang makapag-aral at hinuhubog upang maging mabuting mamumuno sa Pamayanan.
Pangungunahan ni Rev. Fr. Anton CT Pascual ang Executive Director ng Caritas Manila at Pangulo ng Radio Veritas ang pagbubukas dito kasama ang ilang Opisyal ng Lokal na Pamahalaan ng Iloilo.
