22,896 total views
Nanindigan ang Alyansa Tigil Mina (ATM) na nananatiling buhay ang diwa ng People Power sa gitna ng panawagan para sa pananagutan, katarungan at pangangalaga sa kalikasan, kasabay ng paggunita sa ika-40 anibersaryo ng EDSA People Power Revolution.
Ayon sa grupo, apat na dekada matapos ang makasaysayan at mapayapang pagkakaisa ng taumbayan noong 1986, muling nasasaksihan ng taumbayan ang malawakang pandarambong sa ekonomiya at likas-yaman ng bansa.
Iginiit ng ATM na sa halip na ganap na kalayaan at kaunlaran, nananatili ang mabigat na utang ng bansa, malawak na kahirapan, patuloy na pagkasira ng kalikasan, at paglabag sa karapatang pantao—lalo na sa mga pamayanang apektado ng pagmimina.
“Alyansa Tigil Mina (ATM) joins thousands of Filipinos marching in the streets today to demand accountability from corrupt government officials and their private sector cohorts,” pahayag ng ATM.
Binigyang-diin din ng grupo ang pagpasa ng panukalang batas laban sa political dynasty upang maiwasan ang pagkakatuon ng kapangyarihan sa iilang pamilya, kabilang ang mga iniuugnay sa mga usapin sa mga pampublikong proyekto tulad ng maanomalyang flood control projects.
Binatikos ng ATM ang agresibong pagsusulong ng malakihang pagmimina sa ilalim ng administrasyon ni Pangulong Ferdinand Marcos Jr., sa kabila ng matinding pagtutol ng mga lokal na komunidad.
Paliwanag ng grupo na dahil sa pagkiling ng pamahalaan sa mga kumpanya ng pagmimina at sa pagsasantabi sa hinaing ng mga apektadong mamamayan, napipilitan ang ilan na maglunsad ng mga kilos-protesta at magtayo ng mga barikada upang pigilan ang mapaminsalang operasyon at pagpasok ng mabibigat na kagamitan sa kanilang lugar.
“Indeed, the assertion of their democratic rights is justly exercised by marginalized communities that have long suffered government neglect. The vibrant spirit of the people’s power lives on,” ayon sa grupo.
Sa paggunita ng anibersaryo ng EDSA, hinimok ng grupo ang publiko na patuloy na ipaglaban ang dignidad, karapatan, katotohanan at pananagutan.
Anila, ang demokrasya at kalayaang dapat ay napakinabangan na ng mamamayan matapos ang EDSA ay nararapat igiit at isabuhay sa kasalukuyan upang maitaguyod ang malalim at pangmatagalang pagbabago sa araw-araw na pamumuhay.
“Let us not waver in our collective struggle for truth and accountability, social justice and human rights, and an empowering and progressive society for the next generations,” ayon sa ATM.
