802 total views
Hinimok ng HAPAG-ASA Integrated Nutrition Program ang mamamayan na paigtingin ang pagtulong sa mga mahihirap at nagugutom.
Ginawa ni Florinda Lacanlalay, consultant ng HAPAG-ASA Program ang apela sa nalalapit na paggunita ng World Food Day sa October 16.
Umaasa si Lacanlalay na alalahanin ng bawat tao ang kahalagahan ng pagkakaroon ng katiyakan na may makakain ang bawat isa.
“Talagang napakahalaga celebrating the World Food Day, ibig sabihin dapat may food security ang Pilipinas hindi lang ang buong mundo. Mayroong available na pagkain sa kanilang mga lamesa, sa hapag kainan. Unfortunately hindi ganon ang nangyayari ngayon, marami sa ating mga kababayan are food insecure,” pahayag ni Lacanlalay sa Radio Veritas
Upang matugunan ang pagpapakain sa mga malnourished na bata at nagugutom na mamamayan, ay inanyayahan ni Lacanlalay ang lahat na magbahagi ng donasyon sa HAPAG-ASA at sa iba pang church institutions.
“As we Celebrate these events let’s just remember our countrymen, let us remember the least, the last and the lost, not only our prayers but let’s do something concrete,” ayon pa sa panayam ng Radio Veritas kay Lacanlalay.
Sa paggunita ng World Food Day ngayong taon ay ilulunsad ng Caritas Manila Damayan Program ang pagpapakain sa isang (1) libong street-dwellers o mga taong nakatira sa mga lansangan sa Paco Catholic School, St. Vincent de Paul Parish at Most Holy Trinity Parish sa Metro Manila.
Sa pinakabagong talaan ng Philippine Statistics Authority sa unang quarter ng taong 2022, ay umabot sa 3.1-million ang bilang ng mga Pilipinong nagugutom.
Ang World Food Day ay sinimulan ng United Nations Food and Agriculture Organization noong 1945 upang isulong ang food security sa bawat bansa.
