550 total views
Malinaw na employment plan sa labor sector at maayos na agrarian reforms sa sektor ng agrikultura.
Ito ang panawagan sa pamahalaan ng Ecumenical Institute for Labor Education and Research (EILER) sa mabagal na paglago ng ekonomiya dahil sa mataas na inflation rate, mataas na presyo ng mga bilihin, oil price hike at kawalan ng trabaho ng mga manggagawa sa iba’t-ibang sektor.
“Gaano man ka-limitado ang espasyo para sa mga unyon at labor rights advocates sa ganitong proseso, hindi makakailang ang kawalan ng Philippines tri-partite Labour & Employment Plan ay senyales din ng pagpapatuloy ng kawalang-pansin sa napakahirap na kalagayan ng mga manggagawa mula sa administrasyong Duterte hanggang sa ngayon,”mensahe sa Radio Veritas ni Rochelle Porras, Executive Director ng EILER.
Ikinadismaya ni Porras ang kakulangan ng pagtugon ng administrasyong Marcos sa pangangailangan ng mga manggagawa.
Tinukoy ni Porras ang Philippine Statistics Authority na umabot sa 2.68-milyong Pilipino ang nawalan ng trabaho sa nakaraang buwan ng Agosto 2022 lalu na sa sektor ng agrikultura na naitala sa 286-libo.
Pinangangambahan ni Porras na lalu pang babagsak ang agriculture sector kung patuloy na hindi maipatupad ng kasalukuyang administrasyon ang mga agricultural reform.
“Dapat nang ipatupad ang tunay na repormang agraryo upang maisulong ang pagpapaunlad ng kanayunan at pambansang industriyalisasyon, nang sa gayon ay makalikha ng disenteng trabaho at matiyak na may marangal na kabuhayan ang mga Pilipino,”pahayag ni Porras sa Radio Veritas.
Bukod sa mataas na unemployment rate, umaabot na rin sa 3.1-million ang poverty rate ng mga Pilipino sa unang quarter ng 2022.
Una ng nanawagan ang Catholic Bishops’ Conference of the Philippines sa pamahalaan na lumikha ng mga polisiya at batas na tutulungan ang mga manggagawa upang makapamuhay ng may dignidad sa lipunan.
