55,985 total reads
Hinamon ni Cebu Archbishop Alberto Uy ang mga Catholic school na higit pang palalimin ang paghubog sa mga kabataan, lalo na sa panahon ng mabilis na pag-unlad ng teknolohiya at paggamit ng Artificial Intelligence o AI.
Ito ang mensahe ni Archbishop Uy sa closing Mass ng 2026 National Convention ng Catholic Educational Association of the Philippines o CEAP sa Cebu City.
Binigyang-diin ng arsobispo na hindi sapat na matuto lamang ang mga estudyante ng kaalaman at kasanayan. Mahalaga rin aniyang mahubog ang kanilang konsensya at kakayahang kumilala sa tama at mali.
“It is a time for Catholic education to become more Catholic,” pagbibigay diin ng arsobispo.
Dahil dito, hinimok ng arsobispo ang mga guro na isama ang paghubog sa pagpapahalaga at konsensya sa lahat ng asignatura, at hindi lamang iugnay ito sa Religion o Christian Living.
Dagdag pa ng arsobsispo, “I suggest we should not limit values formation to religion or Christian Living classes. We keep those, but every subject should help form conscience.”
Hinimok din ni Archbishop Uy ang mga paaralang Katoliko na maglaan ng mga lugar kung saan maaaring manalangin at magkaroon ng tahimik na oras ang mga estudyante upang mapalalim ang kanilang ugnayan sa Diyos.
Binigyang-diin ng pinunong pastol ng Cebu na sa panahon ng mabilis na pagkalat ng impormasyon, kailangang matutong magsuri ang mga kabataan bago maniwala, magbahagi ng impormasyon o gumawa ng pagpapasya.
“Perhaps, my dear friends, one of the greatest gifts Catholic education can give this generation is the ability to say, ‘Before I click, before I share, before I follow the crowd, before I make a decision, let me ask what is true, what is right, and what is
God asking me to do,’” ayon kay Archbishop Uy.
Para sa arsobispo, mahalaga ang akademikong kahusayan at paghahanda sa hinaharap, ngunit dapat ding humantong ang edukasyong Katoliko sa pagkilala at pakikipag-ugnayan ng mga kabataan kay Hesukristo.
