14,087 total views
Umaasa ang opisyal ng Catholic Bishops’ Conference of the Philippines na nagdulot ng pagpanibago sa mga kabataan ang National Youth Day.
Ayon kay Caceres Archbishop Rex Andrew Alarcon, Chairperson ng CBCP Episcopal Commission on Youth nawa’y sa pagbalik ng mga delegado sa kani-kanilang lugar ay maisabuhay at maibahagi ang mga bunga at aral sa pagtitipon ng mga kabataan.
Tinuran ng arsobispo na ang NYD ay isang paglalakbay kasama si Hesus na gumagabay at nagpapaningas sa pag-asa ng tao.
“As you move on, go home and return, may you bring that renewed spirit, may your encounter with Jesus transform you and may they see that little transformation that has happened in you and may you be an instrument of transformation in your families, communities and society,” pahayag ni Archbishop Alarcon sa Radio Veritas.
Batid ni Archbishop Alarcon ang pag-asa sa 8, 000 NYD delegates ayon na rin sa tema ng pagtitipon na ‘Rejoice in hope, endure in affliction, persevere in prayer.
Aniya napapanahong mapag-alab ang pag-asa ng tao lalo ngayong ipinagdiriwang ng Jubilee Year ng simbahan na nakatuon sa Pilgrims of Hope lalo’t patuloy ang pagbangon ng mumdo sa epekto ng pandemya at iba pang krisis.
“Let us continue this pilgrimage of hope, let us bring this joy which our world needs today, and many of our friends, members of our family, coworkers, they need the hope. We are pilgrims of hope let us bring back undying hope, courage, and perseverance,” dagdag ni Archbishop Alarcon.
Pinasalamatan ng arsobispo ang mga kabataang delegado na tumugon sa paanyayang magbuklod gayundin sa mga nangasiwang matagumpay na naisakatuparan ang NYD Caceres 2025 kabilang na ang Commission on Youth, foster families and parishes na kumanlong sa mga delegado.
Kabilang sa mga limang araw na gawain ang formation, growth session, workshops at community exposure na nagbigay pagkakataon sa mga delegado na makasalumuha ang iba’t ibang sektor ng Bicol.
Samantala pinangunahan ni Caceres Archbishop Emeritus Rolando Tria Tirona ang closing mass sa Our Lady of Peñafrancia Minor Basilica and National Shrine kasama sina Archbishop Alarcon, Antique Bishop Marvyn Maceda, Virac Bishop Luisito Occiano at mga pari ng arkidiyosesis gayundin ang Youth Directors ng mga diyosesis sa bansa.
Inanunsyo naman ni Archbishop Alarcon ang National Conference for Youth Ministers sa 2026 na isasagawa sa Diocese of Kidapawan habang National Youth Day sa 2028 sa Archdiocese of Cagayan de Oro.
