15,557 total reads
Lubos ang pasasalamat ni Jaro Archbishop Emeritus Jose Romeo Lazo sa Panginoon sa pagkakataong makapaglingkod sa kawan at maging daluyan ng pag-ibig sa pamayanan.
Ito ang mensahe ng arsobispo sa pagdiriwang ng ika – 50 anibersaryo ng pagiging pari nitong April 1 sa misang pasasalamat na ginanap sa National Shrine of Our Lady of Candles and Jaro Metropolitan Cathedral.
Binigyang diin ng arsobispo na bagamat maraming hamon ang kanyang pinagdaanan sa nakalipas na limang dekada sa ministeryo ay nanatili itong matatag sa pagtupad ng misyon sa tulong ng pag-ibig ng Diyos.
“I am grateful to be chosen, consecrated and sent to love and serve the people of God,” pahayag ni Archbishop Lazo.
Iginiit ni Archbishop Lazo na hindi maisakatuparan ang misyon bilang pari kung walang pag-ibig na nakaugat kay Hesus sapagkat ang dakilang pag-ibig ng Diyos sa sangkatauhan ang nagpapatibay sa mga gawaing pagpapastol.
Ang limang dekadang paglalakbay bilang pari ay tanda ng pakikiisa ng Diyos sa tao sa pamamagitan ng pagpapadala ng mga pastol sa pamayanan.
“My life as a priest is a journey, a symbol of sandals, and reaching out. A symbol of hands to others, as well as God reaching out to me, or us, with that cross in sight,” dagdag pa ni Archbishop Lazo.
April 1, 1975 nang maordinahang pari ang arsobispo at naglingkod ng halos tatlong dekada sa San Jose de Antique habang 21 taon naman bilang obispo sa tatlong ecclesiastical territories ang Kalibo, Antique at Jaro.
Pinasalamatan ni Archbishop Lazo ang mga pari at mananampalatayang naging kamanlalakbay sa limang dekadang pagiging pari sa Panay Island habang hinimok ang bawat isa na patuloy maglakbay sa diwa ng synodality upang magbuklod ang bawat kristiyano.
Dumalo sa thanskgiving mass ng arsobispo ang mga obispo at pari mula sa iba’t ibang diyosesis sa bansa kabilang na si Papal Nuncio to the Philippines Archbishop Charles Brown nagpapasalamat din kay Archbishop Lazo sa taos puso at buong katapatang paglilingkod sa simbahang katolika.
