6,180 total reads
Nagsilbing Ama na ginabayan ang mga batang pari at seminarista ang yumaong si San Jose de Antique Bishop Emeritus Raul Martirez sa Christ the King Parish, Green Meadows Quezon City.
Ito ang pag-alala ng dating Kura Paroko ng Saint John Paul II Parish Father Jose ‘Bong’ Tupino III sa yumaong Obispo.
“Siya yung tinuturing namin na tatay namin dito sa Christ the King at kahit mahina siya at madaling o madalas na may sakit lagi parin siyang masiyahin at kapag kaya niya yung mga imbitasyon lalung-lalu na sa mga misa at sacraments ay lagi siyang nakahandang umalalay, si Bishop Raul malapit sa mga Pari ng Diocese of Cubao kaya kilala namin siya, lagi namin siyang nakakasama din pag may mga pagkakataon na may activities sa Diocese,” ayon sa panayam ng Radio Veritas kay Father Tupino.
Aminado ang Pari na bagamat labis ang kalungkutan ng Diyosesis ng Cubao ay masaya naman silang isipin na kasama na ng Panginoon si Bishop Martirez.
Panawagan ng Pari sa mga mananampalataya ang patuloy na pananalangin para sa kaluluwa ng yumaong Obispo at pati narin sa ikabubuti ng mga pastol ng simbahan sa Diyosesis ng Cubao.
“Pero si Bishop Raul kahit mahina siya, kahit may sakit sa paggising niya sa umaga makikita mo yung kaniyang pagpapasalamat sa Diyos sa lahat ng biyayang kaniyang patuloy na tinatanggap kaya nagpapasalamat kaming lahat sa inyo na nakikinig at nagdadasal para kay Bishop Raul at sana ipagdasal niyo rin kaming lahat na mga Pari,” bahagi pa ng panayam kay Father Tupino.
Sumakabilang buhay si Bishop Martirez noong September 02, 2024 pasado alas onse ng gabi sa edad 86- taong gulang at inihatid sa huling hantungan noong ika-6 ng Setyembre 2024.
Naordinahan ang Obispo bilang Pari noong March 1961 sa Archdiocese of Capiz at itinalaga siya ni St. John Paul II bilang Obispo ng Antique noong January 5, 1983.
March 16 2002, makalipas ang mahigit dalawang dekadang pagsisilbi bilang Obispo ng Antique nag-retiro si Bishop Martirez at naging aktibo sa pagdiriwang ng mga banal na misa at pagtulong sa mga pamparokyang gawain ng Christ the King Parish sa Greenmeadows, Quezon City.
