512 total views
Binigyang-pansin ng opisyal ng Catholic Bishops’ Conference of the Philippines ang kalagayan ng mga medical frontliners ngayong pandemya na patuloy na ginagampanan ang kanilang misyong bigyang-lunas ang mga apektado ng coronavirus disease.
Sa mensahe ni Puerto Princesa, Palawan Bishop Socrates Mesiona, chairman ng CBCP-Episcopal Commission on Mission, kapansin-pansin na ang paghihirap at sakripisyo ng mga health workers sa kanilang hanapbuhay upang mapaglingkuran ang mga higit na nangangailangan ng atensyong medikal.
Ayon kay Bishop Mesiona, maliban sa lantad ang mga nurse at doktor sa panganib na mahawaan ng COVID-19, lumalabis na rin ang mga ito sa oras ng kanilang pagtatrabaho bunsod ng kakulangan sa mga empleyado ng ospital na mag-aalaga at gagamot sa mga higit na apektado ng virus.
Ito rin ang nagiging sanhi ng paghina ng katawan ng mga medical frontliners kung kaya’t ang mga ito ay nahahawaan na rin ng COVID-19.
“Mahirap po ang kalagayan ng mga health workers nitong panahon ng pandemya. Hindi lamang na sila’y expose na mahawaan ng sakit, overwork din sila dahil sa daming mga pasyenteng kanilang inaalagaan,” bahagi ng pahayag ni Mesiona sa Radio Veritas.
Sinabi ng Obispo na sa sitwasyong ito ng mga medical frontliners ay dapat lamang na pagtuunan ito ng pansin ng pamahalaan upang sila’y mabigyan ng karampatang benepisyo at suporta kapalit ng kanilang sakripisyo.
Kaugnay nito, hinihikayat naman ni Bishop Mesiona ang bawat isa na ipanalangin ang mga medical frontliners upang gabayan ng Panginoon sa kanilang misyon na gamutin ang mga mayroong malubhang karamdaman.
Gayundin, ang gawaran ang mga ito ng ligtas at malakas na pangangatawan laban sa panganib na mahawaan ng nakamamatay na virus.
“Kaya dapat talaga sila suportahan ng ating pamahalaan at patuloy natin silang ipanalangin,” saad ni Bishop Mesiona.
Batay sa tala ng DOH, umabot na sa mahigit 21,000 medical frontliners ang nagpositibo sa COVID-19 magmula nang ito’y lumaganap sa bansa noong nakaraang taon.
Sa bilang na ito, nasa higit 100 medical workers na ang naitalang nasawi sanhi ng nakamamatay na virus.
