9,192 total reads
Bibigyang-diin ng mga makakalikasang grupo na hindi lamang climate change ang nagpapalala sa krisis pangkalikasan sa Pilipinas kundi maging ang korapsyon at pagsasamantala sa likas na yaman.
Ito ang pangunahing tatalakayin sa State of the Philippine Environment (SPE) Forum 2026 na gaganapin, bukas, July 10, sa University of the Philippines Diliman sa Quezon City sa pangunguna ng Center for Environmental Concerns-Philippines at iba pang katuwang na organisasyon.
Ayon sa CEC-Philippines, nananatiling kabilang ang Pilipinas sa mga bansang pinakaapektado ng climate-related disasters, subalit lumilitaw na ang pinsalang dulot ng mga pagbaha, malalakas na bagyo, tagtuyot, at pagguho ng lupa ay lalo pang pinalalala ng mahinang pamamahala sa kalikasan at katiwalian sa paggamit ng pampublikong pondo.
Tatalakayin din sa forum ang katiwalian at greenwashing sa mga proyektong may kaugnayan sa climate adaptation at imprastraktura, gayundin ang epekto ng malawakang pagmimina, reclamation, malalaking energy projects, public-private partnerships, at dayuhang pamumuhunan sa pagkasira ng kalikasan at paglikas ng mga komunidad.
Sinabi ng CEC-Philippines na patuloy ring dumarami ang mga pag-atake at pananakot laban sa mga environmental defender na tumututol sa mga mapaminsalang proyekto sa iba’t ibang bahagi ng bansa.
Inaasahang magbibigay ng kani-kanilang pananawa at karanasan ang mga kinatawan ng civil society organizations, people’s organizations, environmental advocates, at mga dalubhasa hinggil sa kalagayan ng kapaligiran, climate crisis, at pamamahala sa kalikasan ng bansa.
Binibigyang-diin sa Laudato Si’ na hindi maihihiwalay ang pangangalaga sa kalikasan sa pagsusulong ng katarungan at paggalang sa dignidad ng bawat tao.
