1,033 total reads
Nagkaisa ang mga lider at miyembro ng komunidad ng Kristiyano at Muslim sa Lahore, Pakistan sa isang interreligious gathering upang ipanalangin ang agarang pagtigil ng karahasan sa hangganan ng Pakistan at Afghanistan.
Isinagawa ang pagtitipon sa Peace Center sa Lahore, malapit sa makasaysayang Badshahi Mosque, kung saan nagsama ang dalawang pananampalataya sa gitna ng panahon ng Kuwaresma at Ramadan—kapwa panahon ng pag-aayuno, panalangin, at kawanggawa.
Pinangunahan ang pagtitipon nina Fr. Qaisar Feroz OFM Cap., Executive Secretary of the Social Communications Commission of the Catholic Bishops’ Conference of Pakistan, at Sister Azmat, Superior of the Carmelite Apostolic Sisters.
“The extremist violence of the Taliban is a destructive ideology. A joint commitment from believers is needed to stop and transform it,” saad ni Fr. Feroz.
Ayon kay Fr. Asif Sardar, Vicar General of the Archdiocese of Lahore, layunin ng pagtitipon na maging malinaw na simbolo ng pagkakaisa at kapayapaan sa kabila ng umiiral na tensyon at labanan sa border.
Iginiit nila na mahalagang pagtibayin ang ugnayan ng dalawang relihiyon at ipakita na ang pananampalataya ay maaaring magsilbing tulay, hindi pader ng pagkakahati.
Kasabay ng panalangin, nagsagawa rin ng candlelight vigil at Stations of the Cross ang komunidad ng simbahang Katolika bilang panawagan sa tigil-putukan at mas pinaigting na dayalogo sa pagitan ng dalawang bansa.
Mariing kinondena ng mga lider-relihiyoso ang patuloy na karahasan at nanawagan sa pandaigdigang komunidad na tumulong upang mawakasan ang kaguluhan.
Binigyang-diin nila na ang kapayapaan ay dapat maging sama-samang layunin ng sangkatauhan, anuman ang relihiyon at lahi.
