26,894 total views
Tiniyak ng pamunuan ng Minor Basilica and National Shrine of Jesus Nazareno ang mas ligtas at maayos na traslacion sa Nazareno 2026 sa Enero 9, kasunod ng isinagawang walkthrough sa buong ruta ng prusisyon.
Ayon kay basilica rector at parish priest Fr. Ramon Jade Licuanan, pangunahing layunin ng walkthrough ang masuri ang kalagayan ng mga kalsadang daraanan ng andas, lalo’t inaasahan ang mahigit walong milyong debotong lalahok sa kapistahan.
“It’s all about safety. Safety will come after good preparedness. We’re talking about a cumulative number of more than 8 million, so it’s quite substantial,” pahayag ni Fr. Licuanan sa Radyo Veritas.
Binanggit ng pari na maging ang maliliit na lubak at nakaharang na istruktura sa makikitid na kalsada ay maaaring magdulot ng pinsala sa mga nakapaa at siksikang deboto.
Dahil dito, hinimok niya ang mga residente at barangay na nakasasakop sa ruta na tumulong sa paglilinis at pag-aalis ng anumang sagabal sa daan.
“Kaya ang hiling namin ay personal initiative ng mga residente, together with the barangay, na maging malinis at ligtas ang mga lansangan sa pagdaan ng ating Traslacion,” dagdag ng pari.
Inihalintulad ni Fr. Licuanan ang paghahanda sa ginawa ni San Juan Bautista, patron ng Quiapo Church, na “naghanda ng daraanan ng Panginoon.”
“Si San Juan Bautista ang naghanda sa daraanan ng Panginoon; ngayon ginagawa rin natin iyon para sa pagdating ng Poong Hesus Nazareno kasama ang mga deboto,” paliwanag ni Fr. Licuanan.
Kalahok sa walkthrough mula Quirino Grandstand pabalik ng Quiapo Church ang mga kinatawan ng iba’t ibang ahensya ng pamahalaan, security forces, Hijos del Nazareno, at media.
Muling gagamitin ang nakagawiang ruta ng prusisyon na dadaanan ang tatlong malalaking parke at plaza, pitong tulay, isang underpass, at 18 national at city roads.
Patuloy ang puspusang paghahanda ng basilica para sa mga gawain ng Nazareno 2026, kabilang ang National Balangay Conference sa Nobyembre 26 na lalahukan ng mga Hijos del Nazareno na katuwang sa pangangasiwa ng kapistahan.
