15,813 total reads
Naniniwala ang isa sa pinuno ng House Infrastructure Committee na hindi kuwalipikado bilang state witnesses ang mag-asawang kontratista na sina Curlee at Sarah Discaya.
Ayon kay Infracom lead-chairman Bicol Saro Partylist Rep. Terry Ridon, ang mag-asawang Discaya ay kabilang sa itinuturing bilang “most guilty” sa katiwalian kaugnay sa flood control projects.
“Di sila kuwalipikado base sa ‘least guilty’ na pamantayan. Para sa akin, kasama sila sa most guilty sa corruption sa flood control projects,” ani Ridon, na nanawagang kasuhan sila ng plunder o corruption of public officials sa halip na isama sa Witness Protection Program.
Iginiit din ng mambabatas na sapat na ang affidavit ng mag-asawa, kung saan inamin nila ang pagkakasangkot sa korapsyon, upang tanggihan ang anumang hinihinging proteksiyong.
Sinang-ayunan din ni Ridon ang pahayag ni Pasig City Mayor Vico Sotto na nais lang ng mga Discaya na mag-state witness para makaiwas sa asunto, matapos nilang magbigay ng bilyon-bilyong kickbacks sa ilang opisyal ng gobyerno.
Sa Infracom hearing nitong Martes, binunyag ni Ridon na nakakuha ang mga Discaya ng halos ₱93.5 bilyon mula 2014 hanggang 2023 para sa mga proyektong imprastruktura, karamihan ay flood control. Aniya, kung may netong kita silang 10–15%, aabot ito sa ₱9.35 bilyon hanggang ₱14 bilyon.
“That means it’s in the billions,” giit ni Ridon, kasabay ng pagpapaalala na sila mismo ang nagmalaki sa mga panayam na ang kanilang yaman ay nasa “eleven digits.”
