48,648 total views
Hinimok ng Santo Papa Leon ang mga mananampalataya na ipanalangin na maging binhi ng kapayapaan, pagkakasundo, at pag-asa ang mga Kristiyanong nabubuhay sa mga lugar na may digmaan, lalo na sa Gitnang Silangan.
Ito ang panalangin ni Pope Leo XIV para sa buwan ng Disyembre, na nakatuon sa mga Kristiyanong namumuhay sa gitna ng kaguluhan at karahasan.
“Let us pray that Christians living in areas of war or conflict, especially in the Middle East, might be seeds of peace, reconciliation, and hope,” bahagi ng pahayag ng Santo Papa.
Ayon sa Vatican, sa kabila ng nagaganap na kaguluhan sa rehiyon, patuloy na pinangangalagaan ng mga Kristiyanong komunidad ang pananampalataya, naglilingkod sa mga mahihirap, at nakikipagtulungan sa iba pang simbahan at relihiyon upang makabuo ng pagkakaunawaan at pagtutulungan.
Sa isang pag—aral, lumalabas na maraming Kristiyano sa Gitnang Silangan ang nasa matinding panganib dahil sa mga digmaan at mahirap na kalagayang panlipunan. Sa kabila nito, nananatili ang kanilang matatag na pananampalataya at patuloy na nagbibigay ng tulong espirituwal at kabutihan sa kapwa.
Ayon pa kay Pope Leo, “unshakable faith even in the midst of rubble.”
Itinuturing ang mga hakbang na ito bilang tanda ng presensya ng Banal na Espiritu, na nagbibigay ng pag-asa sa pinakamadilim na panahon.
“All of these are signs of the presence of that Holy Spirit who, is the source of hope in the darkest times,’’ ayon kay Pope Leo XIV.
Ang panalangin ni Pope Leo para sa mga Kristiyano sa lugar ng tunggalian ay nakatuon sa pagpapalakas ng pananampalataya, pagkakabuklod sa kapwa, at pagiging binhi ng pagkakasundo at kapayapaan, gayundin sa pagbuo ng katarungan at awa sa lipunan.
Hinimok ng Santo Papa na huwag maging manhid sa paghihirap ng kapwa Kristiyano, sa halip ay maging tagapagtaguyod ng pagkakaisa at kapayapaan sa mundo.
