250 total views
Hinimok ni Manila Archbishop Jose Cardinal Advincula ang mga mananampalataya na maging tunay na katawan ni Kristo sa mundo sa pamamagitan ng malasakit, pakikipagkaisa, at paghahandog ng sarili para sa kapwa.
Ito ang mensahe ni Cardinal Advincula sa Corpus Christi Sunday mass sa Minor Basilica of Our Lady of the Pillar – Archdiocesan Shrine of the Blessed Sacrament o Sta. Cruz Church,Maynila.
Ayon kay Cardinal Advincula, ipinakikita ng Kabanal-banalang Kapistahan ng Katawan at Dugo ni Kristo ang ganap at tapat na pagbibigay ng sarili ni Hesukristo para sa kaligtasan ng sangkatauhan at inaanyayahan ang bawat Kristiyano na tularan ang halimbawa ng Panginoon.
“Ipinapahiwatig ng ating pagdiriwang ngayon ang komprehensibo, ganap, at tapat na pagbibigay-sarili ng ating Panginoong Heso Kristo at inaanyayahan tayong tularan ito. Hinahamon tayong gamitin ang ating mga katawan upang umabot sa iba, ialay ang lahat para sa kanila, at manatili upang magbigay-buhay at maging tunay na katawan ni Kristo sa mundo,” ayon sa pagninilay ni Cardinal Advincula.
Binigyang-diin ng Kardinal ang tatlong paraan upang maisabuhay ito: una, ang pagiging katawang nakararanas at nakaaalala ng pagdurusa kaya nagkakaroon ng malasakit sa kapwa; ikalawa, ang pagiging katawang nakikipagkaisa kay Kristo sa Eukaristiya at sa kapwa sa gitna ng mga pagkakahati-hati sa lipunan; at ikatlo, ang pagiging katawang handang magbahagi at magsakripisyo para sa kapakanan ng iba.
Sinabi ni Cardinal Advincula na ang Eukaristiya ay hindi lamang pagdiriwang sa loob ng simbahan kundi isang misyon na maglingkod, magmahal, at magbigay-buhay sa kapwa, tulad ng ginawa ni Kristo.
“Ang Simbahan ni Kristo ay handang pira-pirasuhin upang maipamahagi, handang mamatay sa sarili upang magbigay-buhay sa iba. As we continue our celebration, let us ask for the grace to see our bodies in the light of the body and blood of Christ. May we use our bodies to feel and respond to the needs around us, to commune with Jesus and each other, and to be broken in order to be shared. Amen,” bahagi pa ng mensahe ni Cardinal Advincula.
Hinimok ng Kardinal ang mga mananampalataya na ialay ang sarili sa Diyos upang maging instrumento ng kagalakan para sa nalulumbay, katarungan para sa naaapi, at kanlungan para sa mga nangangailangan.
