210 total views
Hinimok ni Caceres Archbishop Rex Andrew Alarcon ang mga youth director at youth minister sa bansa na maging mapanatag, mahinahon, at responsable sa kanilang pamumuno sa gitna ng maraming hamon sa ministeryo at ng mabilis na pagbabago ng lipunan.
Sa kanyang homiliya sa misang ginanap sa Sagrada Familia Chapel sa Quezon City, sa pagtatapos ng First National Youth Directors Assembly, binigyang-diin ng arsobispo ang kahalagahan ng pagiging “self-possessed” o may kontrol sa sarili upang epektibong magabayan ang mga kabataan.
Ayon kay Archbishop Alarcon, mahalagang maging maagap sa pagharap sa mga suliranin sa halip na maging pabigla-bigla sa pagkilos at pagpapasya.
“To be proactive rather than reactive. A person who is self-possessed does not react impulsively,” ayon kay Archbishop Alarcon.
Paliwanag ng arsobispo na ang isang mabuting youth leader ay may tiwala sa sarili ngunit hindi kailanman nagiging mapagmataas.
“A person who is self-possessed is a youth director who has confidence, pero hindi siya arrogant,” dagdag ni Archbishop Alarcon.
Binigyang-diin pa ng arsobispo na sa panahon ng matinding pressure, napakaraming pagpipilian, at sunod-sunod na mga gawain, kinakailangan ng mga youth minister ang emosyonal na katatagan at malinaw na pagtukoy sa mga prayoridad upang maipagpatuloy ang kanilang misyon ng paggabay sa mga kabataan patungo kay Kristo.
Dinaluhan ng mga youth director, youth minister, at mga opisyal ng CBCP Episcopal Commission on Youth mula sa iba’t ibang diyosesis sa bansa ang pambansang pagtitipon na naglalayong palakasin ang pamumuno at misyon ng youth ministry sa Pilipinas.
