13,459 total views
Nanawagan si Caritas Manila Executive Director Fr. Anton Pascual sa pamahalaan na seryosohin ang mga imbestigasyon laban sa katiwalian upang mapanagot ang mga tiwaling opisyal at maibalik ang tiwala ng mamamayan sa mga demokratikong institusyon.
“Kailangan makasuhan, malitis, makulong ang mga nagkasala, isoli ang ninakaw upang maibalik muli ang tiwala sa kahalagahan ng democratic institutions tulad ng ating pamahalaan,” pahayag ni Fr. Pascual sa Radyo Veritas.
Iginiit ng pari na hindi lamang pananagutin ang mga sangkot kundi dapat ding ibalik ang mga pondong nilustay upang magamit sa makabuluhang proyekto at programang nakalaan para sa mamamayan, lalo na sa mga dukha.
Binatikos din ni Fr. Pascual ang katiwaliang lumutang sa flood control projects, na nagpapahirap lalo sa mga maralitang Pilipino na pangunahing naaapektuhan ng matinding pagbaha.
“Challenge po sa atin na patuloy magmasid at makialam sa gagawing imbestigasyon ng independent commission dito sa scandal, gargantuan proportion — talagang trilyong piso ang nagastos,” dagdag ng pari.
Sa pagdiriwang ng kapistahan ni Padre Pio, binigyang-diin ni Fr. Pascual ang kahalagahan ng pananalangin at pagkakaisa upang makamtan ang paghilom ng bayan at upang makapaghirang ang sambayanan ng mga tunay na lider na may malasakit at hindi sakim sa kapangyarihan.
“Mahalaga ang panalangin at pagkakaisa ng sambayanan lalo na sa nagaganap ngayon sa ating bansa na naghahanap ng tunay na servant leader,” ani Fr. Pascual.
Bukod sa kanyang tungkulin sa Caritas Manila, si Fr. Pascual ay chaplain din ng Padre Pio Chapel sa Shangri-La EDSA, Mandaluyong, na nagdiriwang ng ika-25 anibersaryo ng 6PM mass kasabay ng kapistahan ng kanilang patron.
Ang mga nalilikom na pondo mula sa kapilya ay napupunta sa iba’t ibang programang panlipunan ng Arkidiyosesis ng Maynila.
