4,622 total reads
Ikinatuwa ng mga opisyal ng simbahang katolika ang pakikiisa ng mga Pilipino sa “Trllion Peso march” sa People Power monument at National Shrine of Mary Queen of Peace o Edsa Shrine.
Pinuri ni San Carlos Bishop Gerardo Alminaza, incoming Caritas Philippines President at Arnold Janssen Kalinga Foundation Founder and 2025 Ramon Magsaysay Awardee Father Flavie Villanueva ang natatanging paninindigan ng mga Pilipino sa naging maksaysayang pagmamartsa upang kundenahin ang katiwalian sa bansa.
Patuloy ang paanyaya ni Bishop Alminaza sa mga Pilipino sa paninindigan laban sa korapsyon na patuloy na pinapahirapan ang mga Pilipino.
“Very loud and clear ang sentimiyento. Halos mga kabataan, pero mayroon ding mga kasing edad ko na anduon na nagsasabi ng the same message na sinasabi natin ngayon dito sa Trillion Peso March na dapat pakadaliin ang pagprosecute, paglilitis ng responsable/ mga salarin, at panagutin talaga; yung accountability, at saka isauli ang ninakaw [ang] malaking inutang sa mga biktima at maraming taon na itong nangyayari pala. So ang laking utang ang dapat singilin ng bayan. Kaya tuwa ko na nagkabuklod-buklod tayo, hindi lamang ang simbahan, kundi lahat ng sektor. Ang importante din na ang simbahan ay matuto na makinig, makilahok, at magsuporta sa daing ng taumbayan, sa anyo ng mga [mabubuting tao] ay nanduon ang simbahan, kasi nanduon din ang Diyos, malapit ang Diyos katabi sa mga naghihirap,” pahayag sa radio Veritas ni Bishop Alminaza
Umaasa naman si Fr.Villanueva na sa paninindigan ng maraming Pilipino sa talamak na korapsyon ay mapapabilis ang paghilom ng Pilipinas na lubhang nalugmok dahil sa laganap na katiwalian na kinasasangkutan ng mga mambabatas at opisyal ng mga ahensiya ng pamahalaan,
Iginiit ng Pari na sa buhay kristiyano ay bawal ang magnanakaw at korap.
“Makiisa sa buhay Kristiyano, bawal [ang] magnanakaw, bawal ang korap,at higit sa lahat, ang pananampalataya ay kasama sa pagtindig natin. Tayo’y tumindig upang ang ating bayan ay mahilom at patuloy maging magiting muli,” bahagi ng panayam ng Radyo Veritas kay Fr.Villanueva sa Trillion Peso March.
