10,025 total reads
Hinihikayat ng Diocese of Kalookan ang mga layko, kabataan, relihiyoso, madre at pari na makiisa sa isasagawang “Trillion Peso March” laban sa katiwalian at maling paggamit ng pondo ng bayan sa darating na September 21, 2025 sa EDSA People Power Monument sa Quezon City.
Sa pangunguna ng Caritas Kalookan, magsisimula ang assembly time sa ganap na alas-11 ng umaga sa San Roque Cathedral sa Caloocan City, at sabay-sabay na tutungo sa EDSA para sa mismong programa sa ganap na alas-2 ng hapon.
Hinihikayat din ng diyosesis ang mga dadalo na magsuot ng puting T-shirt bilang sagisag ng dalisay na paninindigan at pag-asa.
Layunin ng pagkilos ang panawagan ng katarungan at pananagutan para sa mga pamilyang sinalanta at iniwan ng mga palpak na proyekto ng pamahalaan; mga kabataang ninakawan ng kinabukasan; at mga manggagawa at mahihirap na pasan ang bigat ng katiwalian.
Kasabay rin ng pagtitipon ang paggunita sa ika-53 anibersaryo ng deklarasyon ng Martial Law, upang ipahayag ang pagtutol ng sambayanang Pilipino laban sa katiwalian, kawalan ng pananagutan, at pang-aabuso sa kapangyarihan.
Una nang nanawagan si Catholic Bishops’ Conference of the Philippines President Kalookan Bishop Pablo Virgilio Cardinal David sa sambayanang Pilipino, na muling ituring ng lipunan na kahiya-hiya at kasuklam-suklam ang katiwalian, upang mawalan ng puwang ang mga nananamantala sa kaban ng bayan.
