5,801 total reads
Pinatibay ng simbahan ang paninindigan laban sa katiwalian na lubhang nagpapahirap sa mga Pilipino.
Sa pananalasa ni super typhoon Nando, ipinaalala ni San Fernando Bishop Daniel Presto sa mga Pilipino na huwag kalimutan ang nabunyag na katiwalian sa mga flood control projects ng pamahalaan na kinasasangkutan ng mga mambabatas, opisyal ng DPWH at mga kaanak at kaalyadong kontraktor.
Hinimok ni Bishop Presto ang mamamayan na patuloy na manindigan at kumilos para matigil na ang pangungurakot sa kaban ng bayan.
Nanawagan ang Obispo sa taumbayan na sama-samang iparating ang boses sa mga kinauukulan na panagutin ang mga sangkot sa katiwalian.
“Hindi na tayo dapat manahimik na lamang, kundi dapat natin iparating ang ating tinig sa mga kinauukulan. Ito na naman ang mga malakas na ulan, heto na naman ang pagbaha, huwag nating kalilimutan ang ginawa ng mga sangkot dito, dapat ay papanagutin sila, huwag sana nating kalilimutan ang mga taong nasa likod ng mga ma-anomalyang flood control projects sa mga darating na halalan, hawag na natin silang ihahalal muli, kahit na bigyan tayo ng malaking halaga kapalit ng ating boto, huwag nating kalilimutan na magdasal at humingi ng tulong sa Poong Maykapal,” ayon sa mensaheng pinadala sa Radyo Veritas ni Bishop Presto.
Sa kanyang mensahe para sa National Migrants Sunday, iginiit ni Antipolo Bishop Ruperto Santos na napapanahon ng matapos ang kultura ng katiwalian na naging sanhi ng pangingibang bansa ng maraming Pilipino para makahanap ng magandang kinubukasan.
Dahil sa katiwalian, napipilitan ang maraming Pilipino na maghanap buhay sa ibayong dagat dahil sa kawalan ng kabuhayan sa bansa.
Ayon sa Obispo, dapat inuuna ng pamahalaan ang ikabubuti ng pinagsisilbihang mamamayan sa halip na napupunta sa katiwalian.
“We cannot ignore the painful realities that drive many of our kababayan to leave. The political and economic turmoil in our country, fueled by corruption and injustice, has wounded our people deeply. It has eroded trust, stolen livelihoods, and dimmed the light of possibility for many. Yet even in this darkness, the light of Christ continues to shine,” pahayag ni Bishop Santos
Apela nina Bishop Santos at Bishop Presto sa mamamayan na huwag kalimutan ang “floodgates” scandal at huwag nang iboto ang mga pinunong inuuna ang bulsa kaysa serbisyo publiko.
