7,904 total reads
Hinimok ni Cubao Bishop Emeritus Honesto Ongtioco ang mga mananampalataya ngayong Ash Wednesday na gamitin ang panahon ng Kuwaresma upang ipinanalangin sa Panginoon ang ikakabuti ng mundo at kapwa
Hinimok din ng Obispo ang mananampalataya na isapuso ang pagsisi sa mga kasalanan at pag-aayuno.
Inihayag ni Bishop Ongtioco na sa pamamagitan nito ay mapapalalim ang pakikipag-ugnayan kay Hesus at higit na mapalaganap ang pag-ibig ng Panginoon sa pagkalinga sa mga nangangailangan at kapwang mahihirap.
“Sana sa mga pagdiriwang na ating gagawin namnamin natin ang mga ito, hindi sapat na tatanggap tayo ng abo sa noo. Ano ang kahulugan nito? Sinasabi sa atin habang nilalagyan tayo ng abo sa noo “magsisi tayo at at maniwala sa magandang balita” Bahagi ng panampalataya ang isabuhay ito kaya mahalaga na tayo ay makinig sa salita ng Diyos ng may pagmamahal nito at hangarin isabuhay ang mga ito,” ayon sa mensaheng ipinadala ni Bishop Ongtioco sa Radio Veritas.
Hinikayat naman ni Tarlac Bishop Roberto Mallari ang mga mananampalataya na banal na gunitain ang Kuwaresma sa pagsisimula ng Ash Wednesday at ugaliin ang pagdarasal upang mapatibay ang relasyon sa Panginoon.
Umaasa ang Obispo na katulad ng paghinga upang mabuhay ay higit na manalangin ang mamamayan at gawing mahalagang bahagi ng pamumuhay.
Ipinapaalala din ni Bishop Mallari ang ipakita ang pananampalataya sa panginoon sa pamamagitan ng pagtitika at pag-aayuno.
Ipinagdarasal ng Obispo na ngayong Kuwaresma, sa pamamagitan ng pagsasakrispisyo ay hindi makalimutan ng mamamayan ang pagbabahagi sa mga kapuspalad.
“Inaanyayahan din tayong bigyan ng pansin ang mga gawang kabanalan kagaya ng fasting and abstinence para sa lalong ikaliligaya ng Diyos. Ipakita na kaya nating iwanan ang lahat ng nakakasiya sa atin upang maipakita na ang Diyos ang siyang nag-iisang tunay na yaman natin, ang paglalaan ng mga kawanggawa para sa mga mahihirap at nangangailangan natin mga kapatid. Buksan ang mga mata, puso at kalooban sa kanila na madalas ay hindi pinapansin.Tumulong tayo upang maibalik ang dignidad na madalas ay nawawala o natatabunan ng matinding kahirapan, gawin natin ang mga paanyaya ng Kuwaresma upang lalong mapabilis ang pagkilos ng Diyos sa buhay natin: Upang mapabanalan tayo at maging kaisa tayo sa patuloy na pagliligtas ng Diyos,” ayon sa mensaheng ipinadala sa Radio Veritas ni Bishop Mallari.
