7,014 total reads
Iginiit ng Ecumenical Institute for Labor Education and Research o EILER na nananatiling mailap para sa milyun-milyong manggagawang Pilipino ang tunay na kalayaan dahil sa patuloy na epekto ng mga patakarang nakatuon sa tubo ng malalaking negosyo.
Ayon kay EILER Executive Director Rochelle Porras, patuloy na nangingibabaw ang interes ng malalaking kompanya at dayuhang pamumuhunan kaysa sa kapakanan ng mga manggagawa sa ilang umiiral na patakarang pang-ekonomiya.
Binigyang-diin ng grupo ang Wage Rationalization Act, Value-Added Tax o VAT sa batayang produkto at serbisyo, privatization, flexibilization ng paggawa, at iba pang polisiya na sinasabi nilang nagpapabigat sa kalagayan ng mga manggagawa.
Ayon kay Porras, ang mga ito ay patunay ng pag-una sa tubo kaysa sa karapatan ng mga manggagawa.
Aniya, “Ang pagpapatuloy ng Wage Rationalization Act, Value-Added Tax sa mga batayang serbisyo at produkto, pribatisasyon, flexibility ng paggawa, at iba pang anti-mamamayang polisiya ay malinaw na pagprayoritisa sa interes ng tubo ng malalaking negosyo kaysa sa kapakanan ng mga manggagawa.”
Sa kabila ng sinasabing paglago ng ekonomiya dahil sa dayuhang pamumuhunan at pangungutang, sinabi ng EILER na nananatiling mababa ang sahod ng maraming manggagawa, laganap ang kontraktwalisasyon, at nananatili ang mga hamon sa karapatan sa pag-oorganisa at pagbubuo ng unyon.
Naniniwala ang grupo na makakamit lamang ang tunay na kalayaan sa pamamagitan ng pambansang industriyalisasyon, tunay na repormang agraryo, nakabubuhay na sahod, seguridad sa trabaho, at mas demokratikong pamamahala sa ekonomiya at likas na yaman ng bansa.
Giit pa ni Porras, “Ang tunay na kalayaan ay kalayaan mula sa mga polisiyang neoliberal na pumapabor lamang sa tubo, monopolyo, at dayuhang interes.”
Dagdag pa niya, patuloy na ipinapaalala ng Araw ng Kalayaan ang nagpapatuloy na pakikibaka ng mga manggagawa para sa karapatan, pambansang patrimonya, at makataong pag-unlad.
Mensahe ito ng EILER sa paggunita ng Araw ng Kalayaan kung saan muling nanawagan ang grupo ng mas malalim na reporma sa ekonomiya at paggawa para sa mas maayos na kalagayan ng mga manggagawang Pilipino.
