6,936 total views
Nanawagan si Puerto Princesa Bishop Socrates Mesiona, MSP sa pamahalaan na muling suriin ang mga permit sa pagputol ng mga puno kaugnay ng mga proyektong pagmimina sa Palawan, upang mapangalagaan ang kalikasan at kapakanan ng susunod na henerasyon.
Sa inilabas na pastoral letter, nagpahayag ng pagkabahala ang obispo sa lawak ng pinsalang maaaring idulot ng pagmimina sa lalawigan, lalo na sa mga kagubatan at likas na yaman ng Palawan.
Ayon kay Bishop Mesiona, batay sa mga pampublikong dokumento at pinagsamang talaan, hindi bababa sa 218,854 na punongkahoy ang saklaw ng mga Special Tree Cutting and Earth-Balling Permits (STCEP) na inaprubahan para sa mga proyekto ng pagmimina sa mga lugar tulad ng Aborlan, Brooke’s Point, Bataraza at ilang bahaging konektado sa Mt. Bulanjao.
“Nakapagtataka na ang mga ahensiyang inaasahang mangangalaga sa kalikasan ay inaakalang mahigpit sa pagpapatupad ng batas sa karaniwang mamamayan, ngunit tila maluwag at mapagbigay sa malalaking kompanya ng pagmimina at mga makapangyarihang tao. Nagbibigay ito ng impresyon sa ilan na may dalawang uri ng batas sa ating bansa: isa para sa mayayaman at makapangyarihan, at isa para sa mahihirap,” ayon kay Bishop Mesiona.
Binigyang-diin ng obispo na ang pagputol ng mga puno ay hindi lamang usaping pangkapaligiran kundi isang moral na pananagutan sa Diyos, sa kapwa, at sa mga susunod na salinlahi.
Dagdag pa ni Bishop Mesiona, aabutin ng maraming taon bago lumaki ang isang puno kaya’t nakalulungkot isipin na ang libu-libong punong tumubo sa loob ng mga dekada at maging mga siglo ay maaaring maputol sa napakaikling panahon.
Ipinaalala rin ng obispo ang turo ni Pope Francis sa ensiklikal na Laudato Si’ na ang pangangalaga sa kapaligiran ay mahalagang bahagi ng tunay na pag-unlad ng tao at lipunan.
“Kung makapagsasalita lamang ang mga punong ito, marahil ay magsusumamo silang pakinggan natin ang kanilang tahimik na panawagan,” saad ni Bishop Mesiona.
Nanawagan ang obispo sa mga ahensya ng pamahalaan na suriin ang mga permit sa pagputol ng puno, isapubliko ang lahat ng kaugnay na dokumento, alamin kung ang mga ito ay umaayon sa umiiral na mining moratorium sa Palawan, at magsagawa ng mga reporma upang higit na mapalakas ang proteksyon sa mga kagubatan.
Iginiit ni Bishop Mesiona na ang Palawan ay hindi lamang sagisag ng kagandahan kundi isang kaloob ng Diyos na dapat pangalagaan ng bawat mamamayan, upang matiyak na maipapamana sa susunod na henerasyon ang isang buhay at maayos na kalikasan.
