7,820 total reads
Inaanyayahan ng Manila Cathedral ang bawat Pilipino na makibahagi sa isang natatanging pagtatanghal ng mga makasaysayang bagay at larawan bilang bahagi ng pagdiriwang ng ika-128 Araw ng Kalayaan ng Pilipinas sa June 12.
Sa pakikipagtulungan ng Gallery of Prints, tampok sa pagtatanghal na pinamagatang “Manila in Print” ang mga antigong larawan, mapa, at dokumentong naglalarawan sa kasaysayan ng Manila Cathedral, ng Intramuros, at ng lungsod ng Maynila.
Bubuksan ang exhibit sa June 12 sa St. Joseph Chapel ng Manila Cathedral at tatagal hanggang June 14.
Ayon sa pabatid ng katedral, layunin ng inisyatiba na bigyang-halaga ang mayamang kasaysayan at pamanang kultura ng bansa habang ginugunita ng sambayanang Pilipino ang kasarinlan ng Pilipinas.
Sa pamamagitan ng mga makasaysayang materyal na nakapaloob sa exhibit, mabibigyan ang publiko ng pagkakataong mas mapalalim ang pag-unawa sa mga karanasang humubog sa Maynila at sa pambansang pagkakakilanlan ng mga Pilipino.
Bukod sa exhibit, muling bubuksan din ng katedral sa publiko mula alas 9 ng umaga hanggang alas 6 ng hapon ang mga natatanging lugar ng dambana tulad ng cathedral crypt, choir loft, at roof deck ng simbahan.
Magkakaroon ng banal na misa sa alas 7:30 ng umaga at alas 12:10 ng tanghali, pipe organ concert sa alas 9:30 ng umaga at ala 1:30 ng hapon, at free guided tours mula alas 10 ng umaga hanggang alas 3 ng hapon.
Hinikayat ng Manila Cathedral ang mga mamamayan, pamilya, estudyante, historyador, at mga deboto na bisitahin ang Manila in Print exhibit at open house at maging bahagi ng paggunita sa ika-128 anibersaryo ng kasarinlan ng bansa.
