13,491 total reads
Inaanyayahan ng Radyo Veritas ang mga mananampalataya na makibahagi sa Mary and the Eucharist Exhibit na maaring matunghayan sa Fisher Mall, Malabon mula October 1 to 15, 2025.
Ang naturang exhibit ay bilang bahagi na rin ng pagdiriwang ngayong buwan ng Oktubre na itinalaga bilang Buwan ng Santo Rosaryo sa karangalan na din ng Mahal na Birheng Maria na isang paalala para sa mga Katoliko na lalo pang pag-ibayuhin ang pananalangin ng Santo Rosaryo.
Layunin ng exhibit na isulong ang mas malalim na debosyon sa Banal na Eukaristiya at palakasin ang misyon ng Radyo Veritas bilang katuwang ng Simbahan sa pagsusulong ng new evangelization.
Pagbabahagi ni Rev. Fr. Miguel Condez, O. Carm., tampok sa Mary and the Eucharist Exhibit ang mahigit 70 imahe ng Mahal na Birheng Maria sa iba’t ibang titulo, gayundin ang mga banal na kilala sa kanilang debosyon sa Eukaristiya, at marami pang iba.
“Mayroong 70, mahigit po 70 na mga imahe ng ating Inang Maria at makikita natin dito ang iba’t iba kanyang mukha ng kanyang pagninilay at kanyang mga naranasan bilang Ina ng ating Panginoong Hesukristo. At dito po ay makikita natin yung kanyang mga pinagdaanan sa lahat. Ang panahon ng pagpunta rito ay i-align din natin ang ating oras sa pagdarasal at ganyan din makita din natin yung mga pinag-daraanan ng ating Inang Maria.” Bahagi ng mensahe ni Fr. Condez sa Radyo Veritas.
Matatandaang una ng inihayag ni Radyo Veritas President Rev. Fr. Roy Bellen na mahalagang pagkakataon ang naturang exhibit upang mapagnilayan ang kahalagahan ng Eukaristiya sa tulong ng Mahal na Birheng Maria at mga banal.
Dagdag pa ng pari, napapanahon ang naturang gawain lalo na sa kasalukuyang kalagayan ng mundo na hinahamon ng korapsyon, digmaan, at pagkakahati-hati ng lipunan.
Maaaring bisitahin ng publiko ang Mary and the Eucharist Exhibit sa activity center ng Fisher Mall, Malabon tuwing regular mall hours hanggang sa ika-15 ng Oktubre, 2025.
Maaari namang magpatala ng mga mass intentions sa nasabing exhibit at maging Eucharistic Advocate ng himpilan. Ang lahat ng intensyon ay isasama sa mga misa ng Radyo Veritas araw-araw tuwing 6AM, 12NN, 6PM, at 12MN.
