13,074 total reads
Nanawagan ng pananagutan at agarang reporma sa waste management ang Mother Earth Foundation kasunod ng sunog sa Navotas Sanitary Landfill sa Barangay Tanza 2 noong April 10, 2026.
Ayon sa MEF, nakababahala ang insidente lalo’t idineklara nang hindi operational ang landfill mula pa noong August 2025, ngunit patuloy pa ring nagdulot ng panganib sa kalusugan ng mga residente dahil sa makapal at nakalalasong usok na kumalat sa mga karatig na lugar at sa ilang bahagi ng Metro Manila.
Ipinaliwanag ng Mother Earth Foundation na ang pagsusunog ng basura, lalo na ng plastik at halo-halong materyales, ay naglalabas ng mapanganib na kemikal tulad ng dioxins at fine particulate matter na maaaring magdulot ng malubhang sakit at pangmatagalang pinsala sa kapaligiran.
“These toxins pose serious risks to public health, particularly for children, the elderly, and vulnerable communities. And as persistent organic pollutants, they threaten to contaminate the surrounding soil and water long after the flames are extinguished,” pahayag ng MEF.
Binigyang-diin din ng grupo na ang insidente ay sumasalamin sa kabiguan sa maayos na pamamahala ng basura at nag-aambag pa sa climate crisis dahil sa pagbuga ng methane at iba pang greenhouse gases mula sa mga landfill.
Iniulat din ng MEF ang kakulangan ng Philippine Ecology Systems Corporation sa maayos na pagsasara ng pasilidad, kung saan may mga naiwang hindi natapos na proseso kaya’t nanatiling bukas at mapanganib ang tambakan ng basura.
Dahil dito, iginiit ng Mother Earth Foundation ang mahigpit na pagpapatupad ng Republic Act 9003 o ang Ecological Solid Waste Management Act at Clean Air Act, at papanagutin ang mga may responsibilidad sa insidente.
“This is a clear wake-up call to move beyond landfill dependence and fast-track the shift to – and investment in -zero waste systems,” giit ng MEF.
Hinikayat ng grupo ang pamahalaan at publiko na pabilisin ang pagpapatupad ng waste reduction sa pinagmumulan, mahigpit na segregasyon, at pagpapalakas ng Materials Recovery Facilities at recycling tungo sa maayos na sistema ng pamamahala ng basura.
“Change is possible when we act together. Let us demand better systems, support community solutions, and push for a future built on zero waste,” saad ng MEF.
Una nang binigyang-diin ni Pope Francis sa ensiklikal na Laudato Si’ ang kahalagahan ng pagbawas sa paggamit ng mga plastic at iba pang disposable materials upang mapigilan ang pagdami ng basurang nakasisira sa kapaligiran.
