11,409 total views
Umaapela ang Caritas Manila ng tulong para sa mga bulnerableng sektor na lubhang apektado sa pasakit na dulot ng krisis sa ekonomiya na likha ng sobra-sobrang pagtaas sa presyo ng mga produktong petrolyo.
Tinukoy ng Caritas Manila ang matinding pasanin ng transport sector, mga drivers, magsasaka at mangingisda.
Nanawagan ang Caritas Manila ng donasyon sa mga Pilipino na gagamitin sa pamamahagi ng 2-libong pisong gift certificate sa mga matutukoy na benepisyaryo.
Hangad ng Caritas Manila na matulungan ang mga manggagawa sa nasabing sektor upang mabili ang pangunahing pangangailangan sa gitna ng patuloy na pagtaas sa halaga ng mga pangunahing bilihin at serbisyo.
“𝐒𝐚 𝐡𝐚𝐫𝐚𝐩 𝐧𝐠 𝐡𝐢𝐫𝐚𝐩…𝐡𝐚𝐛𝐚𝐠. Sa gitna ng krisis na dulot ng digmaan sa Gitnang Silangan, nais ng Caritas Manila na tulungan ang mga Pilipinong nasa laylayan. Dahil sa patuloy na pagtaas ng presyo ng mga bilihin, magpapaabot ang Caritas Damayan ng tulong na nagkakahalaga ng P2,000 na gift certificate para sa bawat pamilyang higit na nangangailangan—mga drayber, mangingisda, at magsasaka. Ito ay magiging posible sa inyong tulong at kabutihang loob,” ayon sa mensahe ng Caritas Manila.
Sa mga nais makiisa sa inisyatibo, bisitahin ang official facebook page at website ng social arm ng Archdiocese of Manila.
Sinabi ng Caritas Manila na maari ding bumili ng donation voucher sa Lazada ang mga makikiisa sa donation sa drive
‘“Upang makapag-donate, maaaring magpadala sa pamamagitan ng bank transfer sa Caritas Manila Inc. sa BDO, BPI, Metrobank, o RCBC accounts. Maaari ring gamitin ang QR code para sa mas mabilis na transaksyon. Para sa wastong pagkilala ng donasyon, hinihikayat ang mga donor na magpadala ng kopya ng kanilang deposit slip sa Viber, Messenger, o email ng Caritas Manila. Bukod dito, maaari ring bumili ng donation vouchers sa Lazada.”’ bahagi pa ng mensahe ng Caritas Manila.
Sa kasalukuyan, umaabot sa 120-piso kada litro ang presyo ng gasoline, nasa 170-piso naman ang litro ng diesel at 150-pesos naman ang kada litro ng kerosene.
