14,023 total reads
Inihayag ng Diyosesis ng Malolos ang kahandaan ng mga Simbahan sa Bulacan na patuluyin ang mga pamilyang apektado ng nagpapatuloy na sama ng panahon.
Sa pabatid para sa publiko ng Parokya ng San Pedro de Alcantara sa Bocaue, Bulacan ang kahandaang patuluyin ang lahat ng mga pamilya o indibidwal na kinakailangan ng pansamantalang matutuluyan dahil sa epekto ng nagpapatuloy na sama ng panahon dulot ng Habagat.
Ayon sa parokya, bukas ang Simbahan para sa mga pamilyang nagnanais na lumikas sa kanilang mga tahanan dahil sa epekto ng pagbaha na dulot ng sama ng panahon.
“Para sa mga pamilyang o indibidwal na malapit sa Parokya ng San Pedro de Alcantara, ipinababatid na bukas ang Simbahan para sa mga nagnanais na lumikas mula sa kanilang mga tahanan dahil sa epekto ng pagbaha na dulot ng habagat.” Bahagi ng pabatid ng Diocese of Malolos.
Kaugnay nito ayon kay Malolos Diocesan Social Action Coordinator, Ms. Daday Pascual malawak na ang epekto ng kasalukuyang sama ng panahon sa Bulacan kung saan bukod sa pagkalubog sa tubig baha ng maraming mga lugar ay marami na ring mga Simbahan ang pinasok ng baha.
Ibinahagi rin ni Pascual ang inisyal na 300 relief packs ng diyosesis para sa mga apektadong mamamayan.
“Halos lahat po affected. Malalim sa mga affected ng high tide. Pinasok na marami sa mga simbahan pati mother parishes. Obando, Meycauayan, Marilao, Bocaue, Guiguinto, Balagtas, Hagonoy, Polo Valenzuela. Di pa po makatawid yung relief namin, sa ngayon 300 packs pa lang na release. Waiting pa sa transpo.” Ayon kay Pascual sa Radyo Veritas.
Una na ring ibinahagi ng Diyosesis ng Malolos ang pagbubukas ng iba pang mga Simbahan sa diyosesis partikular na sa mga mababang lugar sa Bulacan kasama na Marilao, Guiguinto, Meycauayan, Bocaue, Calumpit, Santa Maria, Hagonoy, Valenzuela, at Malolos.
Samantala, pinangangambahan naman ang patuloy na pagtaas ng antas ng tubig sa Bulacan na maaring umabot ng hanggang sa anim na talampakan dahil sa patuloy na malakas na pagbuhos ng ulan at pagpapakawala ng tubig ng Bustos Dam.
