1,874 total reads
Hindi na bago sa ating bayan ang pagdami ng mga mamamayang nagpupunta sa mga syudad upang makakita ng mas maginhawang buhay.
Sa ngayon nga, umaabot na ng mahigit 12 million ang nakatira sa Metro Manila, at dumarami pa ito kahit na mas malubha ang pagsikip hindi lamang ng traffic, kundi ng mga residential areas, lalo na sa mga informal settlements.
Ang pangyayari ito ay hindi lamang sa ating bansa nangyayari. Ayon sa report ng World Bank, mahigit pa sa apat na bilyong tao sa mundo, o mas marami pa sa kalahati ng pandaigdigang populasyon, ay nakatira na sa mga syudad. Pagdating ng 2050, inaasahang madodoble ang urban population. Maari maging 70 sa 100 katao ang nakatira na sa mga syudad.
Malaking hamon ito kapanalig. Kakayanin ba ng ating mga syudad ang pagdami ng populasyon sa darating na panahon?
Sa ngayon nga, hirap na hirap ang Metro Manila harapin ang mabilis na paglaki ng populasyon nito. Ang kapasidad ng ating mega city ay banat na banat, kapanalig. Ang EDSA, anim na libo lamang ang carrying capacity kada araw kada isang direksyon. Ngayon, mga 7,500 na sasakyan ang gumagamit nito kada oras kada direksyon.
Maliban sa traffic, kapanalig, nag-aagawan na rin sa espasyo para sa mga tirahan ang marami nating mga mamamayan sa mga syudad. Ayon sa World Bank, mahigit kumulang isang bilyon maralitang tagalungsod ang nakatira na sa mga slums at informal settlements. Sa Metro Manila, umabot na ng halos tatlong milyon ang informal settlers.
Ngayon pa lamang, parang kay hirap gawin sustainable ang ating mga syudad. Ano ba ang ating maaring gawin?
Isa rito kapanalig ay ang pagpapalakas pa ng mga local government upang epektibo nilang matugunan ang mga hamon sa kanilang mga syudad. Kailangang maitaas nila ang kanilang revenues upang makapagtatag sila ng mga imprastraktura na makakapangalaga sa paglago ng mga syudad. Kailangan din na mapalakas ang mga lokal na gobyerno sa mga kanayunan upang makapagbigay din sila ng mas maraming oportunidad sa mga mamamayan upang hindi na nila kailangang lumayo pa kakahanap ng magandang buhay.
Kapanalig, ang Mater et Magistra ay nagpapa-alala sa atin na isa-alang-alang tuwina ang kabutihan ng balana, at dapat, ang mga nasa kapangyarihan ang mas masusing magbantay nito. Ang pagtitiyak ng sustainability ng ating mga syudad ay isang paraan ng pagtitiyak ng kabutihan ng balana. Ito ay moral na obligasyon ng bawat isa sa atin, lalo na ng mga taong may hawak ng kapangyarihan sa ating lipunan.
