583 total reads
Umaasa si Joel Palma, President and CEO ng World Wide Fund for Nature Philippines na magiging mas malalim at makahulugan ang magaganap na Earth Hour simula alas otso y medya hanggang alas nuebe y medya ng gabi sa ika-24 ng Marso, 2018.
Ayon kay Palma, sa temang “Connect to Earth” ay bibigyang diin ang mga suliranin sa Biodiversity ng mundo.
Sinabi ni Palma na ang tema ngayong 2018 ay iniugnay noong nakaraang taon na patungkol sa climate change dahil ang samu’t-saring buhay sa kagubatan at karagatan ang pangunahing naaapektuhan ng matinding pagbabago ng klima.
“It’s just getting deeper dun sa issue which is connect to the Earth because at the end of the day everything that we use, we need is actually coming from our planet, our environment so dapat maging conscious tayo dito dahil kung mawala ito, mawawala ang [pinagkukunan ng] mga pangangailangan natin. So connect to earth is just very basic that we have to take care of the planet so the planet can take care of us.” pahayag ni Palma sa Radyo Veritas.
Samantala, naniniwala si Palma na ang tungkulin ng pangangalaga sa kalikasan ay dapat gampanan ng lahat ng tao maging anuman ang kanilang relihiyon o pinaniniwalaan.
Paliwanag ni Palma, malinaw na naipahayag ng Kanyang Kabanalan Francisco sa Encyclical na Laudato Si na mahalagang kilalaning mabuti ng tao ang pagkakaiba ng mga bagay na kinakailangan ng tao sa mga bagay na kagustuhan lamang.
Umaasa ang WWF na sa ganitong paraan ay mapoprotektahan ang kalikasan at mapepreserba ang taglay nitong yaman para sa susunod pang henerasyon.
“It’s the responsibility of everybody and in the faith community whether Catholic whether other faiths we are all one because we are all living in one planet and lahat naman ng teaching is really to be able to use [the environment] sustainably. Ang problema kasi we use so much and merong factor na we need so much pero iba yung need iba yung want and I think this is what the Pope has basically articulated most of the time it’s already wants rather than needs and kapag sumosobra ang wants it will be at the expense of the future generation.” Dagdag pa ni Palma.
Kaugnay nito, noong nakaraang taon ay tinatayang 7-libong mga siyudad mula sa 180 mga bansa ang nakiisa sa Earth Hour habang sa Pilipinas naman ay umabot sa 713 munisipalidad at 29 na mga provincial governments ang lumahok sa naturang pagdiriwang.
Humigit kumulang 166-Meggawatts ng kuryente ang tinatayang natipid sa loob lamang ng isang oras na pagpapatay ng mga ilaw at iba pang electrical appliances noong 2017.
Ngayong taon ang ika-11 taon nang pagdiriwang ng Earth Hour magmula noong 2007 at patuloy na nakikiisa dito ang iba’t-ibang mga organisasyon kasama na ang Simbahang katolika.
Sa tulong ng taunang pagsasagawa ng Earth Hour naniniwala ang mga Obispo ng simbahang katolika na panandaliang nakapagpapahinga ang daigdig, at dahil dito, umaasa ang mga ito na maipagpapatuloy ang ganitong mabubuting gawain para sa kapaligiran, upang mapigilan na din ang “ecocide” o pagpatay sa kalikasan.
