4,204 total views
Itinalaga ni Manila Archbishop Jose Cardinal Advincula si Fr. Sanny De Claro bilang Spiritual Director ng Adoration Nocturna Filipina Regional Council of the Ecclesiastical Province of Manila at bilang National Director ng Tarcisians.
Ang pagtatalaga ay batay sa rekomendasyon ng National Council ng Adoration Nocturna Filipina, bilang pagkilala sa pastoral na sigasig at dedikasyon ng pari sa paglilingkod.
Kabilang sa tungkulin ni Fr. De Claro ang pangunguna sa espirituwal na paghubog ng mga miyembro at pagpapalalim ng debosyon sa Banal na Eukaristiya, gayundin ang pagpapatibay ng misyon ng Eucharistic adoration sa mga samahan.
Epektibo ang appointment kay Fr. De Claro noong May 1, 2026.
Ang Adoración Nocturna Filipina (ANF) ay isang samahan ng mga laykong Katoliko na nakatuon sa gabi-gabing pagdarasal at pagsamba sa Banal na Sakramento.
Nagsimula ang tradisyon na itinatag noong ika-19 na siglo sa Europa bilang tugon sa panawagan ng Simbahan para sa mas malalim na debosyon sa Eukaristiya.
Ito ang tugon ng mga Kristiyano sa malalim na inspirasyong pinakikinggan ng Panginoon ang sinumang nananalangin at nagtatanod sa banal na sakramento upang makabalik sa Roma si noo’y Pope Pius VII na binihag ni Napoleon Bonaparte sa France noong 1814.
October 10, 1920, pormal na naitatag ang ANF sa bansa sa St. Ignatius Church sa Intramuros, Manila, at mabilis na lumaganap sa iba’t ibang diyosesis bilang samahang nagtataguyod ng taimtim na panalangin, pagbabantay sa gabi, at pag-aalay ng sarili para sa Simbahan at lipunan.
