1,822 total views
Nagpahayag ng suporta ang Parish Pastoral Council for Responsible Voting (PPCRV) sa nakatakdang 2023 national election summit na inorganisa ng Commission on Elections (COMELEC).
Inihayag ni PPCRV National Coordinator Dr. Arwin Serrano na magandang hakbang ito ng COMELEC upang matalakay at mapaghandaan ng maayos ang 2025 Mid-term elections at 2028 National elections.
Tiwala si Serrano na isang magandang pagkakataon ang summit upang mapatatag ang ugnayan at pagtutulungan ng mga ahensya at mga grupo na nangangasiwa at nagbabantay sa proseso ng halalan sa bansa.
“Itong mga gagawin at mga usapin para sa darating na Election Summit na pangungunahan ang COMELEC at iimbitahan ang mga iba’t ibang mga partner agencies at saka mga iba’t ibang mga stakeholders including media ay napakagandang hakbang para sa gayun magiging maayos yung ating 2025 and 2028 elections.” Pahayag ni Serrano sa Radio Veritas.
Itinakda ng COMELEC ang kauna-unahang tatlong araw na national election summit sa Enero 2023 na may temang “Pagtutulungan sa Makabagong Halalan”.
Inaasahang magiging daan ang summit para sa mas malawak na ugnayan at pagtutulungan ng iba’t ibang sektor upang maisakatuparan ang maayos, malaya, mapayapa at matapat na halalan sa bansa.
Bilang pangunahing taga-pagbantay ng Simbahan sa halalan ay makikibahagi ang PPCRV sa pagtitipon.
