6,314 total views
Inaanyayahan ng Our Lady of the Most Holy Rosary Parish sa Angeles City, Pampanga ang mga mananampalataya sa maringal na deklarasyon ng parokya bilang minor basilica.
Isasagawa ang pagdiriwang sa June 10 sa alas 9 ng umaga na pangungunahan ni San Fernando Archbishop Florentino Lavarias kasama si Papal Nuncio to the Philippines Archbishop Charles Brown.
Matatandaang January 21 ng kasalukuyang taon nang pahintulutan ng Dicastery for Divine Worship and the Discipline of the Sacraments, ang petisyon ng arkidiyosesis sa pag-aangat ng parokya bilang minor basilica alinsunod sa matibay na buhay liturhikal at malalim na debosyon ng mananampalataya sa Mahal na Birheng Maria.
Aniya ang deklarasyon ng minor basilica ay kasabay ng mga mahahalagang pagdiriwang ng lokal na simbahan at ng lungsod, kabilang ang ika-380 anibersaryo ng Battle of La Naval, ang ika-230 anibersaryo ng pagkatatag ng Barrio Culiat na kalaunan ay naging Balen Culiat, at kasaluyang Angeles City, gayundin ang ika-140 anibersaryo ng kauna-unahang misa na ipinagdiwang sa Pisamban Maragul.
Ito na ang ika-30 minor basilica ng Pilipinas at kauna-unahan sa lalawigan ng Pampanga at sa Archdiocese of San Fernando.
