224 total views
Nanawagan si Romblon Governor Trina Firmalo-Fabic ng masusing pagsusuri sa naging pag-apruba ng Sangguniang Bayan ng San Fernando sa resolusyong nag-eendorso sa aplikasyon ng Altai Philippines Mining Corporation (APMC) para sa planong pagmimina sa bayan.
Ayon sa gobernadora, bagama’t bahagi pa lamang ito ng mas malawak na proseso at hindi pa ganap na pag-apruba sa proyekto, hindi dapat minadali ang pagdedesisyon sa isang usaping may malaking epekto sa kalikasan at sa mga mamamayan.
Binigyang-diin ni Firmalo-Fabic na mahalagang mabigyan ng pagkakataon ang publiko na maipahayag ang kanilang saloobin dahil ang mga residente ang direktang maaapektuhan ng planong pagmimina.
“Ito ay dapat masusing pinag-aralan at binigyan ang mga mamamayan ng pagkakataon na mapakinggan,” pahayag ni Firmalo-Fabic.
Ipinunto rin ng gobernadora ang natatanging halaga ng kalikasan ng Sibuyan, na tahanan ng iba’t ibang uri ng halaman at hayop na kailangang pangalagaan.
Aniya, ang anumang pinsalang maidudulot sa kalikasan ay maaaring magkaroon ng pangmatagalang epekto sa kabuhayan at kinabukasan ng mga taga-Romblon.
Ipinaalala rin ni Firmalo-Fabic na ang tunay na kaunlaran ay hindi lamang nasusukat sa dami ng mga proyektong naipatutupad kundi sa kakayahang mapanatili ang balanse sa pagitan ng pag-unlad at pangangalaga sa kalikasan.
“Nananatiling matatag ang ating paninindigan na ang pag-unlad ng Romblon ay dapat laging kaagapay ng pangangalaga sa ating kalikasan. Ang ating tanggapan ay aktibong makikipagtulungan sa mamamayan upang isulong ang mga pasyang inuuna ang pangmatagalang kapakanan ng bawat Romblomanon at ng mga susunod pang henerasyon,” ayon kay Firmalo-Fabic.
Nauna nang nagpahayag ng pagtutol sa naturang pag-endorso sina San Fernando Mayor Fernando Marin at Bayay Sibuyanon Chairperson at Living Laudato Si’ Philippines Executive Director Rodne Galicha, habang nagsagawa rin ng kilos-protesta ang mga residente at iba’t ibang sektor sa San Fernando.
Bilang pakikiisa, pinatunog din nang ilang minuto ang kampana ng Diocesan Shrine and Parish of Our Lady of the Immaculate Conception, bilang panawagang pagpapakita ng suporta sa mga residenteng naninindigang protektahan ang kalikasan ng Sibuyan.
