921 total reads
Ikinalungkot ng obispo ng Diyosesis ng Tagbilaran ang paglaganap ng mga ‘casino’ sa bansa na makasisira sa moralidad ng mamamayan.
Tinukoy ni Bishop Alberto Uy ang iba’t ibang uri ng pasugalan na pinapayagan ng gobyerno dahil sa kikitaing buwis ng pamahalaan.
Panawagan ng obispo sa mamamayan na ipanalangin ang mga pinuno ng bayan lalo na sa lalawigan ng Bohol na hindi katigan ang mga proyekto o pagpapatayo ng mga pasugalan tulad ng mga casino.
Binigyang diin ni Bishop Uy na hindi makabuluhan ang pagkakaroon ng malaking kita kung kapalit naman ang moralidad ng mamamayan.
“Aanhin ang malaking pondo ng bayan kung nanganganib naman ang moralidad ng tao na magiging sanhi sa pagkalulong sa mga maling gawain,” ani Bishop Uy.
Nobyembre 2021 nang tutulan ng mga obispo ng Bohol, kasama si Bishop Uy laban sa paglaganap ng online-sabong sa lalawigan.
Iginiit ni Bishop Uy na maraming pamilya ang nasisira dahil sa e-sabong, gayundin ang pagtaas ng bilang ng krimen na nakaapekto rin maging ang kabataan.
Buwan ng Mayo ng kasalukuyang taon nang tuluyang ipahinto ni dating Pangulong Rodrigo Duterte ang operasyon ng online sabong batay na rin sa rekomendasyon ng Department of the Interior and Local Government.
Panawagan ni Bishop Uy sa mga opisyal ng pamahalaan na isulong ang ‘Christian leadership’ at tularan ang mga halimbawa ni Hesus bilang mabuting pastol upang manaig sa lipunan ang kabutihan ng bawat mamamayan.
