9,681 total views
Nananatiling hamon sa Catholic Charismatic Renewal ang higit pang pagpapalaganap ng personal na pakikipagtagpo kay Hesukristo at ng karanasan ng pagbibinyag sa Espiritu Santo sa mas maraming mananampalataya.
Ito ang binigyang-diin ni Fe Barino, National Coordinator ng CHARIS Philippines at Coordinator ng Archdiocesan Commission on the Laity ng Archdiocese of Cebu, sa kanyang pagninilay matapos pakinggan ang mensahe ni Pope Leo XIV sa pakikipagpulong nito sa Catholic Charismatic Renewal noong May 30 sa Vatican.
Ayon kay Barino, malinaw ang panawagan ng Santo Papa na ang Charismatic Renewal ay hindi para sa sarili kundi isang kaloob ng Espiritu Santo para sa buong Simbahan.
“The greatest challenge before us today is not simply to preserve the Charismatic Renewal but to share it,” ayon kay Barino.
Paliwanag nito na maraming Katoliko ang nabinyagan ngunit hindi pa ganap na nakararanas ng personal na pakikipag-ugnayan kay Hesukristo at ng kapangyarihang magbago sa kanilang buhay sa pamamagitan ng Espiritu Santo.
Binigyang-diin din ng lay leader na ang pinakamahalagang bunga ng karismatikong karanasan ay hindi lamang ang pagkatuto ng mga aral ng pananampalataya kundi ang tunay na pakikipagtagpo sa Diyos.
“Our lives were changed not because we learned new teachings, but because we encountered the living God,” ani Barino.
Dagdag pa nito, mahalagang paalala sa Simbahan ang sinabi ni Pope Leo XIV na higit na kailangan ng mundo ngayon ang tunay na karanasan sa presensya ng Diyos kaysa sa pagdami ng mga programa at gawain.
“The world today does not simply need more programs or activities; it needs an encounter with the living God,” pahayag ni Barino.
Iniugnay rin ng opisyal ng CHARIS Philippines ang mensahe ng Santo Papa sa pagsusulong ng synodal journey sa Archdiocese of Cebu sa ilalim ng pamumuno ni Cebu Archbishop Alberto Uy, lalo na ang panawagang ilaan ng mga lay organizations ang kanilang mga kaloob at kakayahan para sa misyon ng mga diyosesis at parokya.
Ayon kay Barino, ang mga karisma ay hindi ibinibigay para sa personal na pagkilala o pagkakakilanlan ng isang grupo kundi para sa pagpapatatag ng buong Simbahan.
“The gifts of the Holy Spirit are never given for personal recognition or group identity. They are given for the building up of the Church,” aniya.
Hinimok din nito ang mga lay organizations na manatiling mapagkumbabang instrumento ng Espiritu Santo sa pagpapalaganap ng Ebanghelyo sa mga parokya, pamilya, lugar ng trabaho at maging sa mga nasa laylayan ng lipunan.
Binigyang-diin ni Barino na ang tunay na sukatan ng bunga ng Charismatic Renewal ay ang paglilingkod, pagkakaisa at pagtuturo sa mga tao tungo sa mas malalim na pakikipagtagpo kay Kristo.
“The Renewal bears its greatest fruit when it serves rather than seeks to be served, when it builds communion rather than division, and when it leads people not to itself, but to a deeper encounter with Jesus Christ,” giit ni Barino.
