8,916 total views
Magsasagawa ng Pagtatalaga at Paghahayo ang Diyosesis ng Malolos para sa mga PPCRV Volunteers sa Halalan 2025.
Bilang paghahanda sa nalalapit na 2025 Midterm National and Local Elections ay itinakda ng Diyosesis ng Malolos katuwang ang Parish Pastoral Council for Responsible Voting (PPCRV) at Malolos – Commission on Social Action ang pagtatalaga at paghahayo sa mga PPCRV Volunteers sa ika-4 ng Mayo, 2025 na isasagawa sa lahat ng mga parokya sa diyosesis.
Layunin ng nakatakdang Pagtatalaga at Paghahayo sa mga PPCRV Volunteers ng diyosesis na ipanalangin sa Panginoon ang patuloy na pagbibigay lakas at paggabay sa mga magsisilbing tagapagbantay ng Simbahan sa nakatakdang halalan sa bansa.
Hinihikayat rin ng diyosesis sa bawat isa na patuloy na ipanalangin ang nalalapit na halalan sa ika-12 ng Mayo, 2025 upang matiyak na ito ay maging malinis, matapat, makatotohanan, makabuluhan at mapayapa (Clean, Honest, Accurate, Meaningful, and Peaceful) CHAMP Election.
“Bilang paghahanda sa darating na Halalan 2025, magkakaroon ng PAGTATALAGA AT PAGHAHAYO SA MGA PPCRV VOLUNTEERS PARA SA HALALAN 2025. Inaanyayahan ang lahat ng Volunteers na makipag-ugnayan sa kanilang Parish Coordinator tungkol sa pagtatalagang Ito. Patuloy natin ipanalangin ang ating mga PPCRV Volunteers upang patuloy silang bigyan ng lakas ng Diyos para sa misyon na kanilang gagampanan. Patuloy pa rin tayong manalangin para sa darating na Halalan 2025 upang ito ay maging CHAMP (Clean, Honest, Accurate, Meaningful, and Peaceful Election).” Bahagi ng pahayag ng Diyosesis ng Malolos.
Mula ng maitatag ang PPCRV noong 1991 na layuning maging pangunahing tagapagbantay ng Simbahang Katolika sa pagkakaroon ng isang maayos at tapat na eleksyon sa Pilipinas ay kasalukuyan ng umaabot sa 700,000 ang volunteers nito mula sa may 87 diyosesis sa buong bansa.
Batay sa tala ng COMELEC, aabot sa mahigit 69.6 na milyon ang bilang ng mga rehistradong botante para sa nalalapit na 2025 National and Local Elections kung saan kinakailangang maghalal ng mahigit sa 18,200 mga bagong opisyal ng bayan na kinabibilangan ng 12-senador, mga partylist representatives, congressional district representatives, governor, mayor, sangguniang bayan member at iba pa.
