10,417 total views
Mariing tinututulan ng development at advocacy arm ng Catholic Bishops’ Conference of the Philippines ang desisyon ng Maharlika Investment Corporation (MIC) na mamuhunan sa industriya ng pagmimina.
Kaugnay ito sa paggamit ng mahigit $76-milyong pautang sa Makilala Mining Company Inc. para sa Maalinao-Caigutan-Biyog Copper-Gold Project sa Kalinga.
Ayon kay Caritas Philippines president, Kidapawan Bishop Jose Colin Bagaforo, ang hakbang na Maharlika Fund ay taliwas sa layuning pasiglahin ang ekonomiya, habang nalalagay naman sa panganib ang mga pamayanan at lumalabag sa prinsipyo ng responsableng pangangalaga sa kalikasan.
Nababahala si Bishop Bagaforo na mapupunta lamang sa maling paraan ang paggamit ng pondo ng publiko para pondohan ang industriyang nagdudulot ng pinsala sa kapaligiran.
“This move by the Maharlika Fund betrays the Filipino people’s trust. Instead of supporting industries that promote development and sustainability, the government is channeling resources into extractive projects linked to displacement, deforestation, and human rights abuses,” pahayag ni Bishop Bagaforo.
Matagal nang tinututulan ng Caritas Philippines ang large-scale mining dahil sa mga negatibong epekto nito sa lipunan at kalikasan.
Maraming kaso na ang naitala ng simbahan tungkol sa pagkawala ng mga lupaing ninuno ng mga katutubo, kontaminadong pinagkukunan ng tubig, at mga pamayanang labis na naaapektuhan ng walang pananagutang operasyon ng mga minahan.
Panawagan ng Caritas Philippines sa pamahalaan na muling pag-isipan ang pamumuhunan sa pagmimina at unahin ang mga industriyang tunay na nakatutulong sa mga pamayanan nang hindi sinisira ang kalikasan.
“Economic development should not come at the cost of human dignity and environmental degradation. We remain committed to upholding the integrity of creation and defending those affected by mining,” giit ni Bishop Bagaforo.
