18,478 total reads
Humiling ng panalangin si Pagadian Bishop Ronald Anthony Timoner sa pagsisimula ng kanyang bagong misyon sa Simbahang Katolika—ang pangunguna at paglilingkod sa mahigit isang milyong mga Katoliko ng Zamboanga del Sur.
Binigyang-diin ni Bishop Timoner na mahalaga ang panalangin upang matutuhan at maisakatuparan ang mga gawaing pastoral, lalo na ang pagiging isang simbahang sinodal, kung saan ang mga pari, relihiyoso, at mga layko ay magkakasamang naglalakbay sa pananampalataya at misyon.
Nangako ang obispo ng pamumuno para sa spiritual renewal, missionary discipleship, at sa pagsasabuhay ng kanyang episcopal motto na Surge et Ambula (“Arise and Walk”).
“As I begin my ministry as bishop, please pray for me. To the priests, religious, and lay faithful of the Diocese of Pagadian, in the name of Jesus the Nazarene, arise and walk,” wika ni Bishop Timoner.
Aminado ang bagong obispo sa bigat ng responsibilidad bilang pastol ng isang kawan na ipinagkatiwala sa kanyang pangangalaga, lalo na sa isang lugar na may mga tradisyon at kulturang naiiba sa Bicol region, kung saan isinilang at nagsilbi bilang pari sa loob ng 28 taon.
Inilarawan ni Bishop Timoner ang paglipat bilang parehong isang hamon at pagkakataon.
“I also thank the Lord for giving me the Diocese of Pagadian as a new place for ministry. I come as a learner,” aniya.
Inordinahan at niluklok si Bishop Timoner noong Agosto 13, kasabay ng kanyang ika-54 na kaarawan—sa Sto. Niño Cathedral sa Pagadian City. Pinangunahan ang banal na misa at ang mga ritwal ni Ozamiz Archbishop Martin Jumoad, na nagsilbing apostolic administrator ng diyosesis sa panahon ng sede vacante.
Sina Lipa Archbishop Gilbert Garcera at Caceres Archbishop Rex Andrew Alarcon, parehong mga dating obispo ng Diyosesis ng Daet kung saan nagsilbi si Bishop Timoner, ay nagsilbing co-consecrators.
Ipinahayag ng bagong obispo ang kanyang pasasalamat sa lahat ng mga nakasama niya sa kanyang paglalakbay bilang pari—lalo na ang mga formators sa seminaryo at ang kanyang pamilya na nagbigay ng gabay sa kanyang pananampalataya at bokasyon.
“I have been blessed with a family that nurtured and helped me grow in the different aspects of my life,” wika ng obispo.
Sa kanyang homily, ipinaalala ni Apostolic Nuncio to the Philippines Archbishop Charles Brown sa mga mananampalataya na ang pagiging obispo ay hindi tungkol sa pamumuno na nakabatay sa kapangyarihan, kundi isang huwaran ng buhay na nakaugat kay Kristo.
Dumalo sa seremonya ang humigit-kumulang 60 obispo at maraming mga pari mula sa iba’t ibang diyosesis.
Kabilang din sa mga dumalo ang nakatatandang kapatid ni Bishop Timoner, Fr. Gerard Francisco Timoner III, O.P., ang kauna-unahang Asyano na nagsilbing Master of the Order of Preachers (Dominikano).
Sa isang hiwalay na panayam sa Radyo Veritas, tiniyak ni Zamboanga del Sur Governor Divina Grace Yu ang buong suporta sa lokal na simbahan at ang kanyang kahandaang makipagtulungan sa diocese.
“I commit to support and collaborate with the Church in molding the Zambasurians and in improving the lives of our community. I hope we will have a fruitful collaboration with the local government of Zamboanga del Sur,” pahayag ni Gov. Yu.
Sa tulong ng panalangin, pagkakaisa, at sama-samang commitment, magsisimula na ang pamumuno ni Bishop Timoner bilang pastol ng Diyosesis ng Pagadian—nagdudulot ng pag-asa na patuloy na magsusulong ng pananampalataya sa kanilang komunidad.
