1,765 total views
Humiling ng panalangin at suporta ang Catholic Bishops’ Conference of the Philippines sa mga hakbang ni Pangulong Ferdinand Marcos Jr. upang magawaran ng clemency si Mary Jane Veloso.
Ito ang mensahe ni CBCP Migrants Ministry Vice Chairman, Antipolo Bishop-designate Ruperto Santos kasunod ng paggawad ng clemency sa tatlong Pilipino sa United Arab Emirates.
Ayon kay Bishop Santos nawa’y umusad na rin ang paglaya ni Veloso na nahatulan ng kamatayan sa Indonesia dahil sa drug smuggling noong 2010.
“That’s a truly humanitarian call and very compassionate act of our President BBM. Let us support his appeal, pray hard that in the name of mercy the Indonesian government would grant clemency to MJ Veloso. She has suffered long enough with her imprisonment. And with her health problem she should be much attended to, medical care and charitable measures given,” pahayag ni Bishop Santos.
Kamakailan ay ginawaran ng clemency ni UAE President Mohamed bin Zayed Al-Nahyan ang tatlong OFW kung saan dalawa rito ay nahatulan ng kamatayan dahil sa drug trafficking habang ang ikatlo naman ay nahatulan ng 15 taong pagkabilanggo dahil sa kasong slander.
Dalangin ni Bishop Santos na magbunga ang pagsisikap ni Pangulong Marcos Jr. sa pakikipag-ugnayan kay Indonesian President Joko Widodo sa pagpapalaya ni Veloso sa kabila ng paninidigan nitong sundin ang batas ng Indonesia.
“We pray for her recovery and clemency for MJ, offer our prayers for her healing, clemency and coming home to us. May our almighty God touch the hearts of those people and decide what is beneficial and do what is best for MJ, that is, her safety and vindication,” dagdag pa ng obispo.
Sa datos ng Department of Foreign Affairs 83 OFW ang nasa death row kung saan 56 sa Malaysia habang iba rito ay sa United Arab Emirates, Saudi Arabia, Indonesia, Maldives, Sri Lanka, China, Vietnam, USA, Japan at Brunei.
Umaasa ang obispo na mabigyang pagkakataon ang mga nasa death row na makapagbagong buhay at makauwi ng ligtas sa Pilipinas upang makapiling ang kanilang pamilya.
