588 total reads
Patuloy na hinihikayat ni Cubao Bishop Honesto Ongtioco ang publiko na panatilihin ang pagsunod sa minimum health protocols ngayong panahon ng pandemya.
Ito ang panawagan ng Obispo upang mabawasan ang patuloy na pagtaas ng kaso ng coronavirus disease sa bansa, gayundin upang maiwasan ang pagkahawa laban sa mas mapanganib at mas nakakahawang Delta variant.
Tinukoy ni Bishop Ongtioco ang pagsusuot ng face mask at face shield, paghuhugas ng kamay at ang pag-iwas sa pagsasagawa ng mga pampublikong pagtitipon upang maiwasan ang COVID-19 transmission.
“Kaya sana po patuloy ang ating mga ino-observe na mga protocol at saka ‘yung advice ng gobyerno. Ano ‘yun? Itong paggamit ng facemask, faceshield, paghuhugas ng kamay and then ‘yung pag-iwas sa mga gathering na hindi naman kailangang-kailangan ngayong pandemya… ‘Yan ay pinanggagalingan ng pagkahawa,” bahagi ng pahayag ni Bishop Ongtioco sa panayam ng Radio Veritas.
Sinabi rin ng Obispo na patuloy ang pagsunod ng Simbahan sa mga panuntunan ng Inter-Agency Task Force (IATF) hinggil sa pagsasagawa ng mga religious gatherings ngayong panahon ng pandemya.
Ipinagpapasalamat nito ang malaking tulong ng ‘digital technology’ sa pagsasagawa ng mga Banal na Misa sa pamamagitan ng online live streaming upang patuloy na maipalaganap at maibahagi sa mga mananampalataya ang mabuting balita ng Panginoon sa kabila ng nararanasang krisis dulot ng pandemya.
“Hindi tayo nagkakaroon ng public gathering, ang ginagawa natin, salamat sa Diyos, may digital technology, may live streaming o online mass para maalagaan din ang pananampalataya ng mga tao at patuloy silang magkaroon ng pag-asa,” saad ni Bishop Ongtioco.
Samantala, hinihikayat naman ni Bishop Ongtioco ang publiko na magpabakuna laban sa COVID-19 habang may pagkakataon upang maiwasan ang patuloy pang pagdami ng nahahawaan ng virus sa bansa.
Batay sa COVID-19 Tracker ng Reuters, umabot na sa mahigit 29 na milyon o 13.5-porsyento ng kabuuang populasyon ng bansa ang nakatanggap na ng bakuna laban sa COVID-19.
Habang ayon naman sa tala ng Department of Health, nasa mahigit 123-libo ang kasalukuyang bilang ng aktibong kaso ng nahawaan ng virus sa bansa.
