745 total views
Mahalagang magkaroon ng naaangkop na kaalaman maging ang mga lingkod ng Simbahan sa kasalukuyang reyalidad at sitwasyon ng pulitika sa bansa.
Ito ang ibinahagi ni Diocese of Marbel Bishop Cerilo Allan Casicas – Board Secretary ng CBCP-National Secretariat for Social Action-Justice and Peace kaugnay sa naganap na ikalawang serye ng Good Governance Webinar ng social action arm ng Catholic Bishops’ Conference of the Philippines na NASSA/Caritas Philippines.
Ayon sa Obispo, bilang mga nagsisilbing gabay ng mga mamamayan sa pagninilay sa mga nagaganap sa lipunan ay mahalaga ring ganap na maunawaan ng mga lingkod ng Simbahan ang usapin ng pulitika sa bansa bilang paghahanda na rin sa nakatakdang halalan.
Ipinaliwanag ni Bishop Casicas na mas higit na magagabayan ng mga lingkod ng Simbahan ang mga botante sa pagpili ng mga karapat-dapat na opisyal ng bayan kung bukas ang kanilang kamalayan sa epekto ng kasalukuyang sitwasyon ng pulitika sa socio-economic, cultural at environmental situation ng bansa.
Kabilang sa mga partikular na inaanyayahan ng social action arm ng CBCP para sa ikalawang serye ng Good Governance webinar ng Caritas Philippines ang mga Diocesan Social Action Directors, staff at diocesan in-charge of good governance and election affairs gayundin ang mga may kaugnayan sa education and formation mula sa 86 na mga diyosesis sa bansa.
“We all know that you have been at the forefront of this important and constitutive part of integral evangelization of the Philippine church as indicated the purpose of this webinar mainly to provide us with some update and analysis on the following on the prevailing political realities in our country especially on how politics today has been practice by elected officials and by the electorate or voters and on how these practices affect, influence the socio-economic, cultural and environmental situation and structure of our nation,” pahayag ni Bishop Casicas.
May titulo ang ikalawang serye ng Good Governance Webinar on Political Education ng NASSA/Caritas Philippines na “Politics and Political Participation: A Call for People’s Solidarity, Empowerment and Social Justice”.
Pinangunahan ni Rev. Fr. Wilmer Joseph Tria mula sa Archdiocese of Caceres ang talakayan na may kaugnayan sa kasalukuyang kalagayan ng pulitika sa bansa gayundin ang hamon sa mga lingkod ng Simbahan bilang gabay ng mga mamamayan sa pagninilay sa mga karapat-dapat na ihalal na opisyal ng bayan.
