7,883 total views
Mariing itinanggi ng Arnold Janssen Kalinga Foundation ang alegasyong ibinunyag sa pagdinig ng Senate Blue Ribbon Committee noong Hunyo 4, 2026, na nag-uugnay sa founder ng institusyon na si Fr. Flaviano Antonio “Flavie” Villanueva, SVD sa pagtanggap ng pera sa pamamagitan ng isang sobre at maleta.
Sa inilabas na pahayag ng AJ Kalinga, iginiit nitong walang katotohanan ang mga paratang na iniuugnay kay Fr. Villanueva at walang naganap na mga transaksyong binanggit ng testigo sa pagdinig.
“We categorically deny these allegations. They are false,” ayon sa pahayag ng AJ Kalinga.
Tinutulan ng institusyon ang alegasyon ng paghahatid ng sobre malapit sa isang simbahan sa Mindanao Avenue sa Quezon City na iniuugnay kay Fr. Villanueva.
Ipinaliwanag ng AJ Kalinga na walang anumang parokya, simbahan, o ministry center ng Society of the Divine Word (SVD) sa Mindanao Avenue na tumutugma sa paglalarawan ng testigo.
Pinabulaanan din nito ang alegasyon hinggil sa paghahatid ng maletang may lamang salapi sa isang lugar na tinukoy bilang “33 Clemente,” na ayon sa institusyon ay walang anumang ebidensyang sumusuporta at isa lamang gawa-gawang paratang.
“These allegations are not merely false. They are malicious, defamatory, and a grave injustice against a priest who has devoted his life to serving the poor, accompanying EJK victims and their families, and defending the dignity of those whose voices are often unheard,” giit ng AJ Kalinga.
Kinondena rin ng institusyon ang pagpapakalat ng mabibigat na akusasyong hindi suportado ng ebidensya at salungat sa mga madaling mapatutunayang katotohanan.
Binigyang-diin nito na matagal nang nahaharap si Fr. Villanueva sa mga pag-atake dahil sa kanyang pakikiisa sa mga biktima ng karahasan at pagtatanggol sa mga naaapi.
Iginiit din ng AJ Kalinga na hindi nito hahayaang masira ang kanyang mga dekada ng paglilingkod dahil sa mga gawa-gawang paratang.
Inihayag din ng institusyon na nagsimula na itong magsagawa ng kaukulang legal na hakbang laban sa mga taong nagpakalat ng maling paratang, habang tiniyak na magpapatuloy si Fr. Villanueva sa kanyang ministeryo para sa mahihirap, mga biktima, at mga naghahanap ng katotohanan at katarungan.
“Truth deserves protection. And those who deliberately defame others in the guise of testimony must likewise be held accountable,” pagtatapos ng pahayag.
