8,375 total reads
Nilinaw ni Cubao Bishop Elias Ayuban Jr., CMF ang usapin kaugnay sa pagkakadawit kay Arnold Janssen Kalinga Foundation founder, Fr. Flavie Villanueva, SVD, sa mga paratang hinggil sa pagpapadala ng maletang may lamang salapi, kasunod ng mga pahayag sa pagdinig ng Senado noong Hunyo 4.
Ayon kay Bishop Ayuban, walang parokya o simbahan na ipinagkatiwala sa Society of the Divine Word (SVD) sa Mindanao Avenue o sa mga kalapit na lugar.
Iginiit pa ng obispo, sa loob lamang ng Diocese of Cubao matatagpuan ang presensya ng SVD sa Sacred Heart Parish-Shrine sa Kamuning, Sto. Niño de Violago Quasi-Parish, at Divine Word Shrine sa E. Rodriguez Avenue.
Kasunod nito, mariing tinukoy ni Bishop Ayuban ang pagpapakalat ng maling impormasyon bilang gawain ng kasinungalingan na nagdudulot ng kalituhan at pagkakahati-hati sa lipunan.
“Disinformation is the work of the devil, the father of lies (Jn 8:44). It sows confusion, division, and mistrust—things that run contrary to the Gospel,” pahayag ni Bishop Ayuban.
Hinimok din ng obispo ang publiko na maging mapagmatyag sa katotohanan at iwasan ang pagpapakalat ng maling impormasyon, kasabay ng panawagan para sa responsableng pamamahayag at pakikipag-ugnayan sa kapwa.
“Let us then be vigilant in seeking and speaking the truth, for falsehood is never from God. Let us work together to combat disinformation and uphold the truth with charity and responsibility,” ayon kay Bishop Ayuban.
Nauna nang itinanggi ng AJ Kalinga Foundation ang mga alegasyong iniuugnay kay Fr. Villanueva at inihayag na magsasagawa ito ng mga kaukulang legal na hakbang laban sa mga nagpakalat ng maling paratang.
