1,824 total reads
Dismayado ang Alyansa Tigil Mina sa mga sinabi ni Pangulong Ferdinand Marcos, Jr. sa kanyang ikalawang State of the Nation Address nitong Lunes.
Ayon kay ATM national coordinator Jaybee Garganera, kulang ang mga naging pahayag ni Pangulong Marcos, Jr. at walang nabanggit na anumang pagtugon hinggil sa usaping pagmimina at pangangalaga sa kagubatan.
“Mukhang bulag sa mga problemang pang-kalikasan si PBBM, at hindi nabigyan ng tamang focus ng DENR (Department of Environment and Natural Resources) ang mga isyu ng illegal mining, seabed quarrying, mindoro oil spill at Kaliwa Dam,” pahayag ni Garganera sa panayam ng Radio Veritas.
Hindi rin kumbinsido ang grupo sa mga numerong binanggit ng pangulo hinggil sa renewable energy projects ng pamahalaan.
Iginiit ng ATM na dapat magbigay ng patunay ang pamahalaan partikular ang DENR at Department of Energy na nagpapakita ng resulta ng pakikipag-ugnayan sa iba’t ibang sektor hinggil sa renewable energy projects.
Sa SONA, sinabi ni Pangulong Marcos, Jr. na mayroon nang 126 renewable energy contracts ang inaayos ng pamahalaan para maisakatuparan ang abot-kaya at malinis na enerhiya.
“Dapat magbigay ng maliwanag na listahan o paliwanag ang DENR at DOE kung nasaan at kailan sisimulan o matatapos ang mga RE projects na ito. Mukhang maiiwan sa ere ang mga hinaing ng mga mining-affected communities,” ayon kay Garganera.
Muli namang nananawagan ang grupo na pagtuunan ang pagsasabatas sa Green Bills na makakatulong sa pangangalaga sa kalikasan at mga pamayanang apektado ng mapaminsalang pag-unlad.
Una nang nagpahayag ng pagkabahala si Bayombong Bishop Jose Elmer Mangalinao hinggil sa operasyon ng pagmimina sa bansa, at umaasang magkakaroon ng himala na tuluyan na itong ipatigil ng pamahalaan para na rin sa kaligtasan ng kalikasan at mamamayan.
