963 total reads
Itinalaga ni Pangulong Ferdinand Marcos Jr. si PhilHealth President at Chief Executive Officer Edwin Mercado bilang bagong kalihim ng Department of Health o DOH.
Kinumpirma ito ni Communications Undersecretary Claire Castro ngayong Agosto 10.
Papalitan ni Mercado si Dr. Jose Pujalte Jr., na itinalaga bilang kalihim ng DOH noon lamang nakaraang buwan.
Ayon kay Castro, may malawak na karanasan si Mercado sa pamamahala ng mga institusyong pangkalusugan at nagsilbi bilang president at CEO ng iba’t ibang ospital mula 2000 hanggang 2016.
Samantala, itinalaga naman si Dr. Beverly Lorraine Ho bilang Acting President ng PhilHealth.
Si Ho ay kasalukuyang Chief Health Officer ng Ayala Healthcare Holdings Inc. at dati nang nagsilbi sa Department of Health bilang Assistant Secretary noong 2023 hanggang 2024 at Undersecretary noong 2022.
Sinabi ni Castro, na boluntaryong nagbitiw si Pujalte, at hindi sinagot kung may kaugnayan ito sa kasong isinampa laban sa dating kalihim.
“Sa ngayon ay hindi po natin masasagot. Siya naman po ang boluntaryong nag-resign at ito naman po ay tinanggap ng ating Pangulo,” ayon kay Castro.
Dagdag pa ng opisyal, “Kung ito naman po ay nakasampa na po sa Ombudsman, nasa kamay na po ng Ombudsman ang pag-iimbestiga kung anuman po ang naireklamo laban kay dating Secretary Pujalte.”
Ang reklamo laban kay Pujalte ay una nang iniendorso ng Presidential Complaints Center sa Office of the Ombudsman.
Kabilang sinasabing mga alegasyon ang sinadyang pagkaantala sa pagbili o procurement ng mga gamot at iba pang suplay para sa paggamot sa tuberculosis.
Inihain ang reklamo isang linggo matapos itanggi ni Pujalte ang mga alegasyong nag-uugnay sa kanya sa pagsusugal sa mga casino sa Parañaque City.
