38,902 total reads
Isinumite na ng Department of Budget and Management o DBM kay Pangulong Ferdinand Marcos Jr. ang ₱7.2 trilyong National Expenditure Program o NEP para sa 2027.
Pinangunahan ni DBM Secretary Kim Robert de Leon ang pagsusumite ng panukalang pambansang budget ngayong Lunes, Agosto 10, ayon sa anunsyo ni Communications Undersecretary Claire Castro sa isinagawanga press briefing sa Malacañan.
Ayon kay Castro, nakatuon ang panukalang budget sa edukasyon, kalusugan, kabuhayan, seguridad at pagpapalakas ng mga komunidad, alinsunod sa temang People-Centered Growth for an Inclusive and Resilient Future.
Pormal namang ituturn-over ng DBM sa Kongreso ang NEP 2027 bukas, Agosto 11, bilang bahagi ng proseso ng pagbuo at pag-apruba ng pambansang budget.
Flood control projects, isasama sa 2027 budget
Sa hiwalay na pulong balitaan, inihayag naman ni Department of Public Works and Highways o DPWH Secretary Vince Dizon na isasama sa panukalang 2027 national budget ang mga proyekto para sa flood management at flood mitigation.
Ayon sa kalihim, pangunahing tututukan ng ahensya ang pagpapatupad ng mga flood control masterplan at pagkukumpuni ng mga nasirang flood mitigation projects.
“So, tuluy-tuloy lang tayo and ngayon na papasok na ang 2027 budget na isusumite magkakaroon na tayo ng mga flood management at flood mitigation projects sa 2027 budget at naka-focus tayo dito sa mga iba’t ibang interventions na ito,” ayon kay Dizon.
Kasama rin sa prayoridad ang pagpapalakas ng flood control systems sa mga urban area na mataas ang panganib sa pagbaha, kabilang ang Metro Manila, Cavite, Laguna, Bulacan at Cebu.
Layunin ng mga hakbang na mapababa ang panganib ng pagbaha at maprotektahan ang mga komunidad, kabahayan at pangunahing imprastraktura.
