43,586 total views
Muling inaanyayahan ng Clergy for Good Governance ang publiko na makibahagi sa ‘hindi pangkaraniwang kilos-protesta laban sa katiwalian sa pamahalaan sa pamamagitan ng pananalangin at pagninilay.
Ang gawain ay gaganapin sa November 23, kasabay ng ika-100 taon ng Pista ng Kristong Hari na isasagawa sa Edsa Shrine sa temang ‘Christ the Servant King.’
Magsisimula ang programa sa alas-2:30 ng hapon sa prusisyon sa paligid ng Ortigas na susundan ng misang pangungunahan ni Catholic Bishops Conference of the Philippines (CBCP) President Pablo Virgilio Cardinal David.
Matapos ito, magkakaroon din ng ‘Celebration of Voices’ o mga pagninilay at karanasan ng iba’t ibang sektor ng lipunan.
“Hindi po karaniwang rally na sumisigaw, kundi nagbabahagi nang pagninilay at panalangin. Reflective and prayerful. Walang chanting, walang sloganeering. Each speaker will share a reflection, followed by a prayer,” ayon kay Fr. Robert Reyes, convenor ng CGG sa panayam ng Barangay Simbayanan.
Ayon pa kay Fr. Reyes, “Maganda na ang pagdiriwang ay maging pagkakataon ng sama-samang pagninilay, manalangin at magpakita na mahal natin…hindi lang ang Panginoon Diyos, kundi mahal natin ang Inang Bayan.”
Pinuna rin ng pari ang naging ‘timing’ ng paglalabas ng video message sa social media ni dating Ako Bicol Rep. Zaldy Co, kung saan inakusahan si Pangulong Ferdinand Marcos Jr. at dating Speaker Martin Romualdez na pangunahing may kinalaman sa P100 bilyon ‘insertion’ sa 2025 budget, kasabay ng 3-day Prayer Rally ng Iglesia ni Kristo sa Maynila.
“Nakakatakot kapag galit ang tao. At nakakatakot kapag ‘yung galit ay udyukan mo o mas magalit pa. kaya ‘yung mga nakaraang mga linggo. Iyong pasabog ni Zaldy Co, that was meant to anger people, to fire up anger.”
“We have to tame our emotions and we have to tame our aggression, kasi kung hindi, dahil kapag pumutok ang violence, ang karahasan ay mahirap nang pigilan,” giit pa ng pari.
Kaya’t panawagan ng CCG ang pananagutan at pagpapakulong sa lahat ng mga nagkasala sa bayan.
“Yes, with anger. But anger coupled with a deep belief in the democratic process,” ayon pa sa running priest.
Ang CCG ay samahan ng mga pari mula sa mga diyosesis sa Metro Manila at iba pang mga lalawigan na nagkaisa para sa pagsusulong ng mabuting pamamahala sa gobyerno.
Ang hakbang ay bilang paghahanda sa nalalapit na malaking pagkilos na isasagawa sa November 30, o ang Trillion Peso March 2 sa Edsa People Power Monument, na lalahukan ng mga lingkod ng simbahan, layko, iba’t ibang Samahan ng simbahan at mga katuwang na grupo na kaisang nanawagan para sa transparency at pagpapanagot sa mga tiwali.
Noong September 21, una nang idinaos ang Trillion Peso March kung saan nanindigan ang Simbahan kasama ang iba pang mga relihiyon, non-governement organization at mamamayan sa EDSA People Power Shrine upang kondenahin ang maanomalyang flood control projects at mga nabubunyag na katiwalian sa pamahalaan.
