60,412 total views
Magkakatuwang na nagsagawa ng inisyal na pakikipag-ugnayan at rapid assessment ang Caritas Philippines, Cebu Caritas Inc. at Caritas Germany matapos ang pananalasa ng Bagyong Tino sa lalawigan ng Cebu.
Isinagawa ang pagsusuri sa mga lungsod at mga bayan na labis na naapektuhan ng bagyo sa lalawigan.
Ayon sa inisyal na ulat matindi ang pinsalang idinulot ng Bagyong Tino lalo na sa mga komunidad na hindi nakapaghanda sa naganap na biglaang pagtaas ng tubig-baha.
“The national team of Caritas Philippines together with Cebu Caritas Inc. and Caritas Germany conducted an initial coordination and assessment following the impact of Typhoon Tino in the most affected municipalities and cities in Cebu. The devastation was overwhelming, as most residents were unprepared on the rapid rise of floodwaters.” Bahagi ng pahayag ng Caritas Philippines.
Batay sa inisyal na pagsusuri, libu-libong kabahayan sa tabi ng mga ilog at baybaying dagat ang nasira, kung saan naranasan din maging sa mga private subdivisions ang matinding pagbaha dahilan upang maraming mga pamilya ang umakyat sa bubong para maging ligtas mula sa malakas pagragasa ng tubig baha.
Sa kasalukuyan isinasagawa ng mga lokal na awtoridad at mga residente ang clearing at cleaning operations, gayundin ang search and retrieval efforts sa mga lugar na lubhang nasalanta ng Bagyong Tino.
“Thousands of houses along rivers and coastal areas were destroyed. Even houses in private subdivisions experienced massive flooding, forcing hundreds of families to climb onto rooftops. Clearing and cleaning operations, as well as search and retrieval efforts, are currently ongoing.” Dagdag pa ng Caritas Philippines.
Nanawagan naman ang humanitarian, development and advocacy arm ng Catholic Bishops’ Conference of the Philippines sa mga mananampalataya at mga katuwang na institusyon na ipagpatuloy ang pagbabahagi ng tulong at pagdarasal para sa mga naapektuhan ng bagyo.
Ayon sa inisyal na pagsusuri kabilang sa mga agarang pangangailangan ng mga pamilyang apektado ng Bagyong Tino ang malinis na tubig para sa pag-inom at paglilinis; pagkain at food packs; pangunahing gamit sa bahay; sleeping kits; pansamantalang materyales para sa pagsasaayos ng tirahan; solar lights; lalagyan ng tubig; sanitation at hygiene kits; at maging mga gamot.
Umaasa naman ang Caritas Philippines na sa gitna ng matinding pagsubok na kinahaharap ng mamamayan mula sa mga nakalipas na kalamidad ay manatiling manaig ang pagkakaisa at malasakit ng bawat isa sa pamamagitan ng ating sama-samang pagkilos at pagkakawanggawa upang maibabalik ang pag-asa sa mga pamilyang nawalan ng tahanan at kabuhayan.
“Let us continue to extend our solidarity and compassion to the families affected by Typhoon Tino. Together, through our collective efforts and generosity, we can help them rebuild their homes and bring hope in the midst of devastation.” Ayon pa sa Caritas Philippines.
Batay sa tala ng PAGASA Weather Forecasting Center ang Bagyong Tino ang ika-20 bagyong naitala ngayong taon na nagdulot ng matinding pagbaha at mga pagkasira sa Visayas region partikular na sa Cebu.
